कागदपत्रांची पडताळणी ६ व ७ नोव्हेंबर रोजी होणार

उमेदवारांना मूळ प्रमाणपत्रांसह हजर राहण्याचे निर्देश

नागपूर, ०१ नोव्हेंबर (हिं.स.) :महाराष्ट्र राज्य वीज वितरण कंपनी लिमिटेड (महावितरण) तर्फे विद्युत सहायक पदासाठी नियमानुसार ५० टक्के मर्यादेत एकूण १८४७ उमेदवारांची प्रतीक्षा यादी कंपनीच्या www.mahadiscom.in या अधिकृत संकेतस्थळावर शुक्रवार, दि. ३१ ऑक्टोबर रोजी जाहीर करण्यात आली आहे.

प्रतीक्षा यादीतील सर्व उमेदवारांच्या मूळ कागदपत्रांची व प्रमाणपत्रांची तपासणी ६ आणि ७ नोव्हेंबर २०२५ रोजी त्यांच्या संबंधित परिमंडल कार्यालयांमध्ये सकाळी १० वाजता सुरू होणार आहे. काही कारणास्तव पडताळणी त्या दिवशी पूर्ण न झाल्यास ती पुढील दिवशी घेण्यात येईल. उमेदवारांनी मूळ कागदपत्रांसह स्वतः उपस्थित राहणे आवश्यक आहे, असे महावितरणकडून स्पष्ट करण्यात आले आहे.महावितरणने जाहिरात क्र. ०६/२०२३ अंतर्गत ५,३८१ विद्युत सहायक पदांसाठी गेल्या २० ते २२ मे २०२५ दरम्यान ऑनलाइन क्षमता चाचणी आयोजित केली होती. त्यानंतर निवड यादी आणि परिमंडलनिहाय वर्गीकरण यादी प्रसिद्ध करण्यात आली होती. निवडलेल्या उमेदवारांची कागदपत्र पडताळणी दि. २० ते २२ ऑगस्ट तसेच दि. ९ व १० सप्टेंबर दरम्यान करण्यात आली होती.निवड प्रक्रियेत अपात्रता, गैरहजेरी आणि इतर कारणांचा विचार करून कंपनीने जाहिरातीत नमूद केलेल्या पदांच्या ५० टक्के मर्यादेपर्यंत प्रतीक्षा यादी जाहीर केली आहे. दरम्यान, दिव्यांग प्रवर्गाची निवड प्रक्रिया दिव्यांग कल्याण आयुक्तांच्या दि. १० सप्टेंबर २०२५ च्या आदेशानुसार पुढील सूचना मिळेपर्यंत स्थगित ठेवण्यात आली आहे.

महावितरणने पुढे स्पष्ट केले आहे की, पडताळणीसाठी अनुपस्थित राहणाऱ्या उमेदवारांची निवड रद्द समजली जाईल आणि भविष्यात त्यांच्याशी कोणताही पत्रव्यवहार केला जाणार नाही. पडताळणीनंतर पात्र ठरलेल्या उमेदवारांच्या नियुक्तीसंदर्भातील पुढील प्रक्रिया संबंधित परिमंडल कार्यालयांमार्फत पार पडेल.अधिक माहिती आणि प्रतीक्षा यादीसाठी उमेदवारांनी www.mahadiscom.in या संकेतस्थळाला भेट द्यावी, असे आवाहन करण्यात आले आहे.

-------------------

हिंदुस्थान समाचार / मनोहर कांडेकर