अकोला, 13 नोव्हेंबर (हिं.स.)।तीव्र श्वसनदाह आजारामुळे होणारे बालमृत्यू टाळण्यासाठी राज्यात दि. १२ नोव्हेंबर २०२५ ते २८ फेब्रुवारी २०२६ या कालावधीत सांस मोहीम राबविण्यात येत आहे. एकूण बालमृत्यु पैकी १६.३ टक्के बालमृत्यू हे न्यूमोनिया (तीव्र श्वसनदाह) आजारामुळे होतात याचे गांभीर्य लक्षात घेऊन राज्य शासनाने या कार्यक्रमाचे आयोजन केले आहे. या आजाराबाबत समाजामध्ये जागृती करणे, आजारापासून संरक्षण करणे, आजाराचा प्रतिबंध करणे याविषयी माहिती प्रचार– प्रसिद्धी करण्याचे उद्देशाने हा कार्यक्रम राबविण्यात येत आहे.

सांस (Social Awareness and Action to Neutralize Pneumonia Successfully) मोहिमेद्वारे 'न्यूमोनिया यशस्वीपणे निष्फळ करण्यासाठी सामाजिक जागरूकता आणि कृती' मोहीम अकोला जिल्ह्यामध्ये जिल्हाधिकारी वर्षा मीना, मुख्य कार्यकारी अधिकारी अनिता मेश्राम, उपसंचालक डॉ सुशील कुमार वाकचौरे यांचे मार्गदर्शनाखाली जिल्हा आरोग्य अधिकारी डॉ बळीराम गाढवे, जिल्हा शल्य चिकित्सक डॉ आरती कुलवाल, डॉ विनोद करंजीकर जिल्हा माता बाल संगोपन अधिकारी यांनी या मोहिमेचे नियोजन केलेले आहे.

या मोहिमेत जिल्ह्यातील ० ते ५ वर्षे वयोगटातील बालकांचे घरोघरी जाऊन सर्वेक्षण करण्यात येणार आहे.आशा स्वयंसेविका,आरोग्य कर्मचारी यांचे मार्फत प्रत्यक्ष घरोघरी भेटीद्वारे मुलांची तपासणी करण्यात येणार आहे. लक्षणे आढळून येणाऱ्या मुलांना उपचार देण्यात येणार आहेत. तसेच आवश्यकतेनुसार संदर्भ सेवा दिली जाणार आहे. याकरिता नमूद कालावधीत मोठ्या प्रमाणावर निमोनिया आजाराबाबत जनजागृती, प्रसिद्धी, प्रचार करण्यात येणार आहे. सर्व आरोग्य संस्थांमध्ये आवश्यक औषध साठा, ऑक्सिजन साठा उपलब्ध ठेवण्यात आलेला आहे.संदर्भ सेवेसाठी आवश्यक उपाययोजना नियोजन करण्यात आलेले आहे. प्रचार प्रसिद्धीकरिता सोशल मीडिया, पोस्टर, बॅनर, हस्तपत्रिका यांचा वापर करून मोठ्या प्रमाणावर प्रसिद्धी करण्यात येणार आहे.

मोहिमेकरिता आशा स्वयंसेविका,आरोग्य कर्मचारी,वैद्यकिय अधिकारी यांचे आवश्य्क प्रशिक्षण घेण्यात आले आहे.

न्यूमोनिया (तीव्र श्वसनधाह) आजाराची लक्षणे

१)खोकला / श्वास घेण्यास त्रास होत आहे.२)बालकाला १४ दिवसांपेक्षा अधिक काळ खोकला येणे ३)गिळता न येणे किंवा मातेचे दूध ओढता न येणे ४)सेवन केलेले सर्व पदार्थ उलटून पडणे ५)आकडी / झटके येणे ६)सुस्ती येणे किंवा बेशुद्ध पडणे ७)श्वास घेताना असामान्य आवाज -Grunting / Groaning ८)Cyanosis ओठांचा/हातांचा निळसर रंग ९)तीव्र श्वसन दाह / श्वास घेण्यास खूप जास्त त्रास १०) २ महिने ते १२ महिने वयोगटातील बालक श्वास मिनिटाला ५० किंवा अधिक असतील ११) १२ महिने ते ५ वर्षे वयोगटातील बालक मिनिटाला ४० वा त्याहन अधिक श्वास १२) छाती आत ओढणे १३) ऑक्सीजन (SpO२) ९० टक्केपेक्षा कमी

वरील प्रमाणे लक्षणे आढ्ळुन आल्यास आशा स्वयंसेविका,आरोग्य कर्मचारी,वैद्यकिय अधिकारी यांचेशी संपर्क करावा व तपासणी करिता घरी येणारे आरोग्य कर्मचारी आशा स्वयंसेविका यांचेकडुन ० ते ५ वर्षे वयोगटातील बालकांची तपासणी करून घेऊन मोहीम यशस्वी करण्यासाठी जनतेने सहकार्य करावे असे आवाहन डॉ बळीराम गाढवे, जिल्हा आरोग्य अधिकारी, अकोला यांनी केले आहे.

---------------

हिंदुस्थान समाचार / जयेश गावंडे