रत्नागिरी, 2 नोव्हेंबर, (हिं. स.) : कोणत्याही शासकीय अधिकारी/कर्मचाऱ्याने किंवा त्यांच्या वतीने खासगी व्यक्तीने लाचेची मागणी केल्यास तत्काळ विभागाशी संपर्क साधावा, असे आवाहन लाचलुचपत प्रतिबंधक विभाग पोलीस उपअधीक्षक अविनाश पाटील यांनी केले.

दक्षता जनजागृती सप्ताहानिमित्त लाचलुचपत प्रतिबंधक विभागाकडून २७ ऑक्टोबर ते २ नोव्हेंबर कालावधीत विविध जनजागृती उपक्रम राबविण्यात आले. या अभियानाअंतर्गत पोलीस उपअधीक्षक श्री. पाटील यांनी आकाशवाणी केंद्र भ्रष्टाचार निर्मूलन या विषयावर मार्गदर्शनपर मुलाखत दिली. या मुलाखतीत त्यांनी नागरिकांना लाचलुचपत प्रतिबंधक विभागाच्या टोल-फ्री क्रमांक १०६४ व संपर्क क्रमांक ०२३५२-२२२८९३ बाबत सविस्तर माहिती देत भ्रष्टाचाराविरोधात सजग राहण्याचे आवाहन केले.

सप्ताहात रत्नागिरी रेल्वे स्टेशनवर रेल्वे पोलीस व नागरिकांना भ्रष्टाचार निर्मूलनाबाबत माहिती देण्यात आली. उपस्थित कर्मचारी व नागरिकांना हॅण्डबिलचे वाटप करण्यात आले. दर्शनी ठिकाणी भित्तिपत्रके लावून जनजागृती करण्यात आली. रत्नागिरी ग्रामीण पोलीस ठाणे येथील कर्मचारी व पोलीस पाटील यांना भ्रष्टाचार निर्मूलनाबाबत माहिती देऊन लाचखोर अधिकारी/कर्मचाऱ्यांविरुद्ध विभागाकडे तक्रार देण्याबाबत आवाहन करण्यात आले. रत्नागिरी बसस्थानकावरही नागरिकांना भ्रष्टाचार निर्मूलनाबाबत माहिती देण्यात आली. बसस्थानकात व परिसरातील ठळक ठिकाणी भित्त्पत्रके लावून उपस्थित नागरिकांना हॅण्डबिलचे वाटप करण्यात आले.

स्थानिक वृत्तपत्रे, स्थानिक वृत्तवाहिन्या, केबल नेटवर्क, आकाशवाणी केंद्र तसेच सोशल मीडियाद्वारे विशेषतः व्हॉट्सअॕप ग्रुप्समधून नागरिकांपर्यंत भ्रष्टाचाराविरोधी संदेश प्रसारित करण्यात आला. तक्रारीकरिता लाचलुचपत प्रतिबंधक विभागाशी ०२३५२-२२२८९३ या फोनवर आणि टोलफ्री क्रमांक १०६४ या क्रमांकाबाबत जनजागृती करण्यात येत आहे.

लाचलुचपत प्रतिबंध विभागाचे पोलीस उपअधीक्षक अविनाश पाटील (७५८८९४१२४७), पोलीस निरीक्षक मच्छिंद्र जाधव (९८७०४७४५३५), पोलीस निरीक्षक सुहास रोकडे (९०६७०३५९१०) यांच्याशी तात्काळ संपर्क साधावा. तसेच acbmaharashtra.net या संकेतस्थळावर तसेच ईमेल आयडी acbratnagiri@gmail.com, dyspacbratnagiri@mahapolice.gov.in येथेही तक्रार करता येईल.

---------------

हिंदुस्थान समाचार / रत्नागिरी