पालघर, 6 डिसेंबर (हिं.स.)। कुपोषण निर्मूलन, मातृ-शिशु पोषण सुधारणा आणि Nurture App च्या प्रभावी वापरासाठी जिल्हा परिषद पालघरतर्फे आज जननायक बिरसा मुंडा सभागृहात उन्नत प्रशिक्षण कार्यशाळेचे आयोजन करण्यात आले. जिल्हा परिषद पालघरचे मुख्य कार्यकारी अधिकारी मनोज रानडे (भा.प्र.से.) यांनी कार्यशाळेला भेट देत अधिकारी-कर्मचाऱ्यांशी थेट संवाद साधला आणि पोषण योजनांच्या प्रभावी अंमलबजावणीसाठी आवश्यक दिशानिर्देश दिले.

या कार्यशाळेत जिल्ह्यातील १२ ग्रामीण व ३ नागरी प्रकल्पांतील बालविकास प्रकल्प अधिकारी, मुख्य सेविका, पर्यवेक्षिका आणि विस्तार अधिकारी मोठ्या संख्येने सहभागी झाले. अंगणवाडी व्यवस्थापन, मातृ-शिशु नोंदणी, पोषण स्थितीचे डिजिटल ट्रॅकिंग आणि लाभ योजनांचा वेगाने वितरण या मुद्द्यांवर मार्गदर्शन करण्यात आले.

मुख्य कार्यकारी अधिकारी मनोज रानडे यांनी अपात्र लाभार्थ्यांची छाननी तातडीने पूर्ण करून पात्र महिलांपर्यंत लाभ वेळेवर पोहोचवण्याचा भर दिला. गरोदर व स्तनदा मातांची अचूक माहिती संकलित करून नोंदण्या वाढवण्यावर लक्ष केंद्रीत करण्याचे ते म्हणाले. तसेच दुसऱ्या अपत्यावर थांबण्यासाठी जनजागृती उपक्रम अधिक जोमाने राबवावेत, असे आवाहनही त्यांनी केले.

नवीन अंगणवाडी बांधकामांच्या गुणवत्तेबाबत दक्ष राहण्याचे निर्देश देत पर्यवेक्षिकांनी प्रत्यक्ष बांधकामस्थळी भेट देऊन पाहणी करावी, असे त्यांनी सांगितले. जिल्ह्यात आदर्श ठरत असलेल्या ‘पालवी’ प्रकल्पाचे त्यांनी विशेष कौतुक करत हा उपक्रम सर्व प्रकल्पांत प्रभावीपणे राबवण्याची अपेक्षा व्यक्त केली. तसेच “बाळाचे पहिले सुवर्णमय 1000 दिवस” या महत्त्वपूर्ण उपक्रमाची काटेकोर अंमलबजावणी करण्याचे आदेश दिले.

कार्यशाळेत Nurture App मधील नोंदी अद्ययावत करणे, पोषण ट्रॅकरवरील प्रकल्पनिहाय स्थिती, कुपोषित बालकांची सद्यस्थिती, VCDC/UCDC तसेच NRC दाखल बालकांसाठी आवश्यक उपाययोजना याबाबत सविस्तर चर्चा करण्यात आली. बालविकास प्रकल्प अधिकारी डहाणू सतीश पोळ यांनी प्रकल्पनिहाय सखोल प्रशिक्षण दिले.

कार्यक्रमाला जिल्हा कार्यक्रम अधिकारी व्ही. एम. हुंडेकर, बालविकास प्रकल्प अधिकारी अमोल पवार, पालवी प्रकल्पाचे तुषार मराड तसेच इतर उपस्थित होते.

---------------

हिंदुस्थान समाचार / NAVIN NARESH PATIL