सोलापूर, 6 डिसेंबर (हिं.स.)।

- महाराष्ट्र साहित्य परिषद शाखा दक्षिण सोलापूर यांच्या वतीने राष्ट्रप्रेमी राष्ट्रीय वक्ते पुष्पेंद्र कुलश्रेष्ठ यांचेे रविवार दि. 7 डिसेंबर रोजी सायंकाळी हुतात्मा स्मृती मंदिरात भारत का भविष्य या विषयावर व्याख्यानाचे आयोजन करण्यात आले आहे. या कार्यक्रमासाठी छत्रपती संभाजी नगरचे देवगीरी नागरी सहकारी बँकेचे अध्यक्ष किशोर दादा शितोळे हे प्रमुख पाहुणे असणार आहेत. अशी माहिती अध्यक्षा रेणुका महागांवकर, कार्याध्यक्ष प्रशांत बडवे यांनी दिली.

भारतीय राजकारण आणि भारतीय इतिहासाची मांडणी करणारे ज्येष्ठ पत्रकार तथा अखंड हिंदु राष्ट्राचे स्वप्न सत्यात उतरवण्यासाठी प्रयत्नशील असलेले सामाजिक कार्यकर्ते पुष्पेंद्र कुलश्रेष्ठ यांच्या वाणीतून भारतीय इतिहास तसेच भारताचे भविष्य यावर विचार एैकण्याची संधी सोलापूरकरांना महाराष्ट्र साहित्य परिषद शाखा दक्षिण सोलापूर यांच्या वतीने उपलब्ध करून देण्यात आलेली आहे. अनेक वर्षे पत्रकार म्हणून सेवा बजावल्यानंतर पुष्पेंद्र कुलश्रेष्ठ यांनी वैचारीक चळवळ उभी करण्यासाठी सुरू केलेले कार्य कौतुकास्पद आहे. अखंड हिंदु राष्ट्राचे स्वप्न पाहून नव्या पिढी समोर भारतीय परंपरा आणि इतिहास मांडण्याचा ते प्रयत्न करीत आहेत. त्याचाच भाग म्हणून सोलापूरकरांना त्यांचे विचार एैकण्याची संधी उपलब्ध करून देण्यात आली आहे.बौध्दिक व्याख्यानाचा लाभ सोलापूरकरांना व्हावा या हेतुने महाराष्ट्र साहित्य परिषद शाखा दक्षिण सोलापूर यांच्या वतीने भारत का भविष्य या विषयावर त्यांच्या व्याख्यानाचे आयोजन करण्यात आले आहे. रविवार दि. 7 डिसेंबर 2025 रोजी हुतात्मा स्मृती मंदिरात तरूण तरूणींनी मोठ्या संख्येने हजेरी लावून या व्याख्यानाचा लाभ घ्यावा तसेच सभागृहातील पहिल्या तीन रांगा राखीव ठेवण्यात आलेल्या आहेत. असे सांगण्यात आले. हा कार्यक्रम सर्वांसाठी खुला असून नागरीकांनी मोठ्यासंख्येने उपस्थिती राहावे असे आवाहनही यावेळी करण्यात आले. या कार्यक्रमाच्या यशस्वीतेसाठी उपाध्यक्ष प्रा.दीपक देशपांडे, कार्यवाह जितेश कुलकर्णी,कोषाध्यक्ष अमोल धाबळे,कार्यकारणी सदस्य प्रकाश मोकाशे, पृथा हलसगीकर, मेधा कुलकर्णी, अविनाश महागांवकर, प्रसिध्दी प्रमुख विनायक होटकर आदी कार्यरत आहेत. व्याख्यानाला येणार्‍या नागरीकांच्या सोईसाठी हुतात्मा स्मृती मंदिराच्या आवारात स्क्रीन, खुर्च्या आणि स्पिकरची व्यवस्था करण्यात आली आहे.

---------------

हिंदुस्थान समाचार / यशपाल गायकवाड