लंडन, 7 डिसेंबर (हिं.स.)।ब्रिटनमधील हीथ्रो विमानतळावर रविवारी सकाळी पेपर (मिरची) स्प्रेने अनेक लोकांवर हल्ला झाल्यानंतर मोठी घबराट पसरली. माहिती मिळताच पोलिस तात्काळ घटनास्थळी पोहोचले आणि हल्ल्याच्या संशयावरून एका व्यक्तीला अटक केली. हल्ल्यानंतर निर्माण झालेल्या गोंधळामुळे प्रवाशांना मोठ्या अडचणींचा सामना करावा लागला आणि अनेक उड्डाणे बाधित झाली.

मेट्रोपॉलिटन पोलिसांनी सांगितले की ही घटना दहशतवादाशी संबंधित नाही आणि जखमींना झालेल्या दुखापती जीवघेण्या किंवा कायमस्वरूपी नाहीत. हल्लेखोराबद्दल अद्याप सविस्तर माहिती समोर आलेली नसली तरी पोलिसांचा अंदाज आहे की हा परस्पर वादाचा प्रकार आहे आणि यात सामील लोक एकमेकांना ओळखत होते.

पोलिसांच्या निवेदनानुसार, “काही पुरुषांनी कथितरित्या काही लोकांवर पेपर स्प्रे फवारला आणि नंतर घटनास्थळावरून पळ काढला.त्यानंतर शस्त्रधारी पोलिस अधिकारी घटनास्थळी पोहोचले आणि हल्ल्याच्या संशयावरून एका व्यक्तीला ताब्यात घेतले. तो सध्या पोलिस कोठडीत असून इतर संशयितांचा शोध सुरू आहे.”या घटनेमुळे टर्मिनल 3 च्या मल्टी-स्टोरी पार्किंगमध्ये गोंधळाचे वातावरण निर्माण झाले आणि अनेक उड्डाणांना विलंब झाला.

हीथ्रो विमानतळाने निवेदन जारी करून म्हटले, “आम्ही टर्मिनल 3 च्या मल्टी-स्टोरी कार पार्कमध्ये आपत्कालीन सेवांसह एका घटनेला प्रतिसाद देत आहोत. प्रवाशांनी विमानतळावर येण्यासाठी अतिरिक्त वेळ ठेवावा आणि त्यांच्या एअरलाइनकडून ताज्या माहितीसाठी संपर्क साधावा.”

जखमींना लंडन अॅम्बुलन्स सेवेद्वारे रुग्णालयात नेण्यात आले.मेट्रोपॉलिटन पोलिसांचे कमांडर पीटर स्टीव्हन्स म्हणाले, “प्राथमिक चौकशीतून असे दिसते की हा एकमेकांना ओळखणाऱ्या लोकांमधील वाद होता, जो वाढला आणि अनेकजण जखमी झाले. आम्ही याला दहशतवादी घटना मानत नाही. आमचे अधिकारी त्वरित पोहोचले आणि सकाळभर हीथ्रो येथे अतिरिक्त पोलीस बंदोबस्त ठेवण्यात आला आहे. परिसरातील लोकांच्या सहकार्याबद्दल धन्यवाद.”

---------------

हिंदुस्थान समाचार / Priyanka Bansode