परभणी, 9 डिसेंबर (हिं.स.)। विद्यार्थ्यांच्या जिज्ञासा, संशोधन वृत्ती आणि सर्जनशील-नवकल्पना विकसित करण्यासाठी जिल्हास्तरीय भव्य विज्ञान महोत्सव आयोजित करण्यात आला आहे. हा महोत्सव कॉस्मोपॉलिटन एज्युकेशनल अँड वेल्फेअर सोसायटी आणि जिल्हा परिषद, परभणी यांच्या संयुक्त विद्यमाने नांदखेडा रस्त्यावरील क्वीन्स स्कूल या ठिकाणी दि. 26 व 27 डिसेंबर 2025 रोजी पार पडणार आहे.

थोर अणुशास्त्रज्ञ व अणुऊर्जा आयोगाचे माजी अध्यक्ष पद्मविभूषण डॉ अनिल काकोडकर यांच्या प्रमुख उपस्थितीत हा दोन दिवसीय महोत्सव भव्यदिव्य पद्धतीने संपन्न होणार आहे.

या विज्ञान महोत्सवामध्ये खालील आकर्षक उपक्रमांचे आयोजन करण्यात आले आहे.

• शास्त्रज्ञांसोबत प्रकट मुलाखत

• विविध विज्ञान कृती आणि स्पर्धा

• शिक्षकांसाठी शैक्षणिक साधन निर्मिती स्पर्धा

• रिसर्च पेपर सादरीकरण स्पर्धा

• विद्यार्थ्यांसाठी वैज्ञानिक प्रात्यक्षिके आणि मॉडेल्सची प्रदर्शनी

• विज्ञानाधारित नाटिका व खेळ

• विज्ञान प्रश्नमंजुषा स्पर्धा

या सर्व स्पर्धेतील विजेते, उपविजेते आणि उल्लेखनीय कामगिरी करणाऱ्या सहभागी विद्यार्थ्यांना व शिक्षकांना मान्यवरांच्या हस्ते प्रशस्तीपत्र, ट्रॉफी, लॅपटॉप व टॅबलेट इत्यादी आकर्षक बक्षिसांनी सन्मानित करण्यात येणार आहे. दोन दिवसीय विज्ञान महोत्सवाला भेट देण्यासाठी सर्व शाळांनी आपल्या विद्यार्थ्यांची गुगल फार्मद्वारे नोंदणी करावी. तसेच विविध स्पर्धांमध्ये सहभाग वाढवण्यासाठी सोबत देण्यात आलेल्या https://aftabmaliksir.github.io/Science-Festival-/GoogleForm लिंकद्वारे विद्यार्थ्यांची नोंदणी मोठ्या प्रमाणात करावी. या विज्ञान महोत्सवात विद्यार्थ्यांना, शिक्षकांना आणि नागरिकांना पद्मविभूषण डॉ अनिल काकोडकर यांच्या मार्गदर्शनाखाली चर्चा, प्रश्नोत्तरे, विविध वैज्ञानिक प्रयोग, मॉडेल्सचे प्रदर्शन आणि इतर अनेक उपक्रमांचा प्रत्यक्ष अनुभव घेता येणार आहे.

परभणी जिल्ह्यातील सर्व शाळांनी आपल्या विद्यार्थ्यांच्या वैज्ञानिक जाणीवेला चालना देण्यासाठी या भव्य विज्ञान महोत्सवात उत्स्फूर्तपणे सहभाग घ्यावा, असे आवाहन आयोजन समितीचे प्रमुख खासदार डॉ फौजिया खान आणि माध्यमिक शिक्षणाधिकारी डॉ सविता बिरगे यांनी केले आहे.

---------------

हिंदुस्थान समाचार / Chaitanya JayantRao Chitnis