नवी दिल्ली , 9 डिसेंबर (हिं.स.)।मायक्रोसॉफ्टचे सीईओ सत्य नडेला यांनी मंगळवार, 9 डिसेंबर 2025 रोजी पंतप्रधान नरेंद्र मोदी यांची भेट घेतली. मायक्रोसॉफ्टने भारतात आशिया खंडातील आपला आतापर्यंतचा सर्वात मोठा — 1.5 लाख कोटी रुपयांहून अधिक — गुंतवणूक करण्याचे आश्वासन दिले आहे. सत्य नडेला यांनी जाहीर केले की भारतात एआयच्या विकासासाठी आवश्यक पायाभूत सुविधा आणि कौशल्यवृद्धीसाठी ते 17.5 अब्ज अमेरिकी डॉलर (सुमारे 1.5 लाख कोटी रुपये) गुंतवणार आहेत. हे आशियामधील मायक्रोसॉफ्टचे आतापर्यंतचे सर्वात मोठे गुंतवणूक पॅकेज ठरेल. त्यांनी सांगितले की यामुळे भारताला एआय-फर्स्ट राष्ट्र बनण्यात मोठी मदत मिळेल.

पंतप्रधान मोदी म्हणाले, “एआयबद्दल बोलताना जग भारताबद्दल आशावादी आहे. सत्य नडेला यांच्याशी अत्यंत फलदायी चर्चा झाली. मायक्रोसॉफ्ट आशियात आपली आतापर्यंतची सर्वात मोठी गुंतवणूक भारतात करत आहे, हे पाहून आनंद झाला. भारतातील तरुण या संधीचा लाभ घेऊन इनोव्हेशन करतील आणि उत्तम जगासाठी एआयची शक्ती वापरतील.”या वर्षाच्या सुरुवातीला देखील पंतप्रधान मोदी आणि सत्य नडेला यांची भेट झाली होती. त्या वेळी मायक्रोसॉफ्ट सीईओने सोशल मीडियावर पोस्ट करून सांगितले होते की ते भारतासोबत एआयच्या क्षेत्रात घनिष्ठ सहकार्य करू इच्छितात. त्यांनी लिहिले होते, “भारताला एआय-फर्स्ट बनवण्याच्या आमच्या वचनबद्धतेला पुढे नेताना आणि देशात आमचा विस्तार वाढवताना आम्हाला आनंद होत आहे, जेणेकरून एआय-प्लॅटफॉर्मच्या या परिवर्तनाचा लाभ प्रत्येक भारतीयापर्यंत पोहोचू शकेल.”

सत्य नडेला सध्या मायक्रोसॉफ्टचे अध्यक्ष आणि मुख्य कार्यकारी अधिकारी (सीईओ) आहेत. 2014 मध्ये स्टीव्ह बाल्मर यांच्या निवृत्तीनंतर त्यांनी मायक्रोसॉफ्टचे सीईओ पद स्वीकारले. त्यानंतर 2021 मध्ये जॉन डब्ल्यू. थॉम्पसन यांच्या पदत्यागानंतर नडेला मायक्रोसॉफ्टचे अध्यक्ष झाले. त्यापूर्वी ते मायक्रोसॉफ्टच्या क्लाउड आणि एंटरप्राइझ समूहाचे कार्यकारी उपाध्यक्ष होते.

---------------

हिंदुस्थान समाचार / Priyanka Bansode