रत्नागिरी, 20 नोव्हेंबर, (हिं. स.) : गेल्या सात सप्टेंबर च्या शासन निर्णयान्वये मराठा-कुणबी व कुणबी-मराठा जातीचे जात प्रमाणपत्र जिल्ह्यातील पात्र व्यक्तींना देण्याबाबतची कार्यपद्धती विहित करण्यासाठी निवृत्त न्यायमूर्ती संदीप शिंदे यांच्या अध्यक्षतेखाली समिती स्थापन करण्यात आली आहे. ही समिती जिल्ह्याला भेट देणार असून जिल्ह्यातील नागरिकांनी त्यांच्याकडील उपलब्ध असलेले पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तावेज इत्यादी जुने अभिलेख जिल्हाधिकारी कार्यालयातील विशेष कक्षात येत्या २१ ते २४ नोव्हेंबर या कालावधीत जमा करावेत, असे आवाहन करण्यात आले आहे.

समितीचा जिल्हानिहाय दौरा प्रसिद्ध करण्यात आला आहे. त्याअनुषंगाने या समितीने जिल्ह्यातील नागरिकांकडून त्यांच्याकडील उपलब्ध असलेले पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तावेज इत्यादी जुने अभिलेख स्वीकारण्याबाबत निर्देश देण्यात आलेले आहेत. ते स्वीकारण्यासाठी जिल्हाधिकारी कार्यालयात विशेष कक्ष स्थापन करण्यात आला आहे. तेथे २१ ते २४ नोव्हेंबर या कालावधीत पुरावे जमा करावेत, असे आवाहन करण्यात आले आहे.

हिंदुस्थान समाचार