रत्नागिरी, 17 मार्च, (हिं. स.) : गिफ्ट लागल्याचे सांगून चिपळूणमधील एका तरुणीला ७८ हजार १८६ रुपयांना ऑनलाइन गंडा घालण्यात आला. सायली शंकर चिपळूणकर (२३, रा. नागावे-शंकरवाडी, ता. चिपळूण) असे तरुणीचे नाव आहे. फसवणुकीचा प्रकार १४ मार्च रोजी दुपारी तीन ते सायंकाळी सहा या वेळेत घडला. या प्रकरणी रजत अग्रवाल याच्या विरोधात गुन्हा दाखल करण्यात आला आहे.

नागावे येथील सायली चिपळूणकर या तरुणीला एक फोन आला. पलीकडून हिंदी भाषेतून संभाषण करणाऱ्याने, 'मी अर्थ कंपनीतून बोलत आहे. तुम्ही आमच्या रेग्युलर कस्टमर असल्याने तुम्हाला एसी, वन प्लसचा फोन, लॅपटॉप, टीव्ही, फ्रिज असे गिफ्ट लागले आहे. त्यातले तुम्हाला काय पाहिजे, अशी विचारणा केली.

सायलीने सोनीचा टीव्ही पाहिजे, असे सांगताच त्यासाठी तुम्हाला अर्थ कंपनीकडून ४ हजार रुपयांची खरेदी करावी लागेल, असे सांगण्यात आले. खरेदीचे पेमेंट युनियन बॅंकेच्या खात्यावर करा, असेही सांगण्यात आले. त्यानंतर सायलीने गुगल पेवरून पाचवेळा एकूण ७८,१८५.९९ रुपये ट्रान्स्फर केले. ही रक्कम पाठविल्यानंतर कोणत्याही प्रकारची वस्तू देण्यात आली नाही. आपली फसवणूक झाल्याचे लक्षात येताच सायलीने अले पोलीस ठाण्यात फिर्याद दिली. त्यानुसार गुन्हा दाखल करण्यात आला आहे.

हिंदुस्थान समाचार