भारताला मिळणार 31 प्रीडेटर ड्रोन
अमेरिकन काँग्रेसने दिली सौद्याला मंजुरी न्यूयॉर्क, 02 फेब्रुवारी (हिं.स.) : अमेरिकन काँग्रेसने भार
संग्रहित


अमेरिकन काँग्रेसने दिली सौद्याला मंजुरी

न्यूयॉर्क, 02 फेब्रुवारी (हिं.स.) : अमेरिकन काँग्रेसने भारताला 31 शक्तीशाली प्रीडेटर ड्रोन एमक्यू 9-बी चा पुरवठा करण्यास मंजुरी दिली आहे. यासंदर्भात यूएस स्टेट डिपार्टमेंटने प्रीडेटर ड्रोन बनवणाऱ्या ऍटॉमिक्स कंपनीला तसे निर्देश दिले आहेत. त्यामुळे आता भारताला अमेरिकेकडून प्रीडेटर ड्रोन मिळण्याचा मार्ग मोकळा झाला आहे. ड्रोन बनवणाऱ्या कंपनीने भारत सरकारच्या अधिकाऱ्यांनाही याबाबत कळवले आहे.

भारताला मिळाणारे प्रीडेटर ड्रोन हे शत्रूच्या गुप्तचर यंत्रणेला खीळ घालण्यास सक्षम आहेत. ते इतके शक्तिशाली आहेत की ते 40 हजार फूट उंचीवरून शत्रूवर लक्ष ठेवू शकतात आणि 450 किलोपेक्षा जास्त वजनाच्या बॉम्बसह उडू शकतात. त्यांच्यात आणखीही अनेक वैशिष्ट्ये आहेत. प्रीडेटर ड्रोनसाठी भारत आणि अमेरिका यांच्यात 3 अब्ज डॉलर्सचा करार झाला आहे. त्यानुसार भारताला 31 एमक्यू प्रीडेटर ड्रोन विकण्याची अधिसूचना लवकरच जारी केली जाणार आहे. अमेरिकेच्या परराष्ट्र खात्याने भारतासोबत 31 प्रीडेटर ड्रोन पुरवण्याचा करार केला आहे. यामध्ये भारतीय नौदलाला सर्वाधिक 15 ड्रोन्स मिळतील. त्याचबरोबर भारतीय सैन्य आणि हवाई दलाला प्रत्येकी 8 ड्रोन दिले जाणार आहेत.

प्रीडेटर ड्रोन यूएव्ही तंत्रज्ञानाने सुसज्ज आहेत. याचा अर्थ ते दूरस्थपणे नियंत्रित केले जाते. एमक्यू-9बी प्रीडेटर ड्रोनमध्ये क्षेपणास्त्रे तैनात केली जाऊ शकतात. त्याचा सर्वात मोठा फायदा म्हणजे तो शत्रूच्या ठिकाणाला अचूकपणे लक्ष्य करू शकतो. त्याचे दोन प्रकार आहेत. एक स्काय गार्गन आणि दुसरा सी (सी) गार्गन. याचा अर्थ ते हवाई आणि सागरी दोन्ही क्षेत्रांत सैन्याला बऱ्यापैकी लाभ देऊ शकतात. एमक्यू-9-बी ड्रोन हवेत 35 तास सतत उडू शकतो, ज्यामुळे तो शत्रूवर दीर्घकाळ नजर ठेवू शकतो.

प्रीडेटर ड्रोनची वाहक क्षमता 5670 किलो आहे आणि त्याची इंधन क्षमता 2721 किलो आहे. प्रीडेटर ड्रोन 40 हजार फूट उंचीपर्यंत काम करू शकते. ते 450 किलो वजनाच्या बॉम्बसह उडू शकते. हे ड्रोन इतके अत्याधुनिक आहेत की ते जमीन, समुद्र आणि हवेवर अतिशय प्रभावी आहेत. प्रीडेटर ड्रोनमध्ये स्वयंचलित टेक-ऑफ आणि लँडिंगची क्षमता देखील आहे आणि ते दिवस आणि रात्री दोन्ही चालवता येते.

हिंदुस्थान समाचार


 rajesh pande