अबुजा, ९ सप्टेंबर (हिं.स.) : येथील अगाई येथे रविवारी (८ सप्टेंबर) रोजी भीषण अपघातात तेलाच्या टँकरने गुरे घेऊन जाणाऱ्या ट्रकला धडक दिली, त्यामुळे प्रचंड स्फोट झाला. या दुर्घटनेत ४८ लोकांचा जागीच मृत्यू झाला असून, सुमारे ५० गुरे जिवंत जळून खाक झाली आहेत.

घटनास्थळी त्वरित शोध आणि बचाव कार्य सुरू करण्यात आले आहे. नायजर राज्याचे पोलीस महासंचालक अब्दुल्लाही बाबा-अरब यांनी सुरुवातीला ३० मृतदेह सापडल्याची माहिती दिली, परंतु नंतर हे आकडे ४८ वर गेले. सर्व मृतांचे सामूहिक दफन करण्यात आले आहे.

या अपघातामुळे स्थानिक लोकांमध्ये प्रचंड संताप पसरला आहे. त्यामुळे नायजर राज्याचे गव्हर्नर मोहम्मद बागो यांनी नागरिकांना शांत राहण्याचे आवाहन केले आहे.

नायजेरियात रेल्वे यंत्रणा नसल्यामुळे मालवाहतुकीसाठी मुख्यतः ट्रकचा वापर केला जातो, ज्यामुळे अपघातांची संख्या वाढत आहे.

२०२० मध्ये पेट्रोल टँकरच्या १,५३१ अपघातांमध्ये ५३५ लोकांचा मृत्यू झाला होता, तर १,१४३ लोक जखमी झाले होते.

हा अपघात नायजेरियातील अव्यवस्थित वाहतूक व्यवस्थेचे एक भीषण उदाहरण आहे, जिथे वारंवार होणाऱ्या अपघातांमुळे मोठ्या प्रमाणावर जीवितहानी होत आहे.

हिंदुस्थान समाचार / Shuddhodana Mangorao