नवी दिल्ली, 7 डिसेंबर (हिं.स.)भारताला २०११ मध्ये एकदिवसीय विश्वचषक जिंकून देणारे प्रशिक्षक गॅरी कर्स्टन यांची नामिबियाच्या पुरुष राष्ट्रीय संघाचे सल्लागार म्हणून नियुक्ती करण्यात आली आहे. कर्स्टन पुढील वर्षी फेब्रुवारी-मार्चमध्ये भारत आणि श्रीलंका यांच्यात होणाऱ्या टी-२० विश्वचषकाची तयारी करण्यासाठी मुख्य प्रशिक्षक क्रेग विल्यम्स यांच्यासोबत काम करतील.

कर्स्टन यांनी क्रिकेट नामिबियाच्या निवेदनात म्हटले आहे की, क्रिकेट नामिबियासोबत काम करणे खरोखरच एक भाग्य आहे. त्यांचे नवीन अत्याधुनिक क्रिकेट स्टेडियम हे त्यांच्या राष्ट्रीय संघांना जगातील सर्वोत्तम क्रिकेट खेळणाऱ्या राष्ट्रांशी स्पर्धा करण्याची खात्री करण्याच्या त्यांच्या वचनबद्धतेचे प्रतीक आहे. नामिबियाचा वरिष्ठ पुरुष राष्ट्रीय संघ चांगली कामगिरी करत आहे आणि पुढील वर्षी फेब्रुवारीमध्ये होणाऱ्या टी-२० विश्वचषकाच्या तयारीत योगदान देण्यास मी उत्सुक आहे.

दक्षिण आफ्रिकेचे माजी सलामीवीर कर्स्टन यांनी २००४ मध्ये निवृत्त झाल्यानंतर कोचिंग करण्यास सुरुवात केली आणि २००७ मध्ये त्यांना भारताचे मुख्य प्रशिक्षक म्हणून नियुक्त करण्यात आले. त्यांच्या कार्यकाळात भारताने २०११ चा एकदिवसीय विश्वचषक जिंकला. नंतर त्यांनी दक्षिण आफ्रिकेचे मुख्य प्रशिक्षक म्हणून आणि जगभरातील अनेक टी२० फ्रँचायझी लीगमध्ये संघांसोबत काम केले. २०२४ मध्ये त्यांनी पाकिस्तान पुरुष संघाचे मुख्य प्रशिक्षक म्हणूनही काम केले. २०२४ च्या टी२० विश्वचषकापूर्वी कर्स्टन पाकिस्तान संघाचे मुख्य प्रशिक्षक बनले.

---------------

हिंदुस्थान समाचार / वृषाली देशपांडे