लखनऊ, १ ऑक्टोबर (हिं.स.): उत्तर प्रदेशातील मुझफ्फरनगर जिल्ह्यात भरधाव कारने रस्त्याच्या कडेला उभ्या असलेल्या ट्रकला धडक दिली. या अपघातात 6 जणांचा मृत्यू झाला आणि एक जण जखमी झाला. मुख्यमंत्री योगी आदित्यनाथ यांनी घटनेची दखल घेतली आणि मृतांच्या कुटुंबीयांप्रती सांत्वन व्यक्त केले. त्यांनी अधिकाऱ्यांना घटनास्थळी पोहोचून जखमींना सर्वोत्तम उपचार देण्याचे निर्देश दिले.

मुझफ्फरनगरचे वरिष्ठ पोलीस अधीक्षक संजय कुमार यांनी सांगितले की, हरियाणातील करनाल जिल्ह्यातील फरीदपूर गावातील रहिवासी महेंद्र जुनैजा यांचे नुकतेच निधन झाले. त्यांच्या अस्थी विसर्जनासाठी कुटुंब हरिद्वारला जात होते. मुझफ्फरनगर जिल्ह्यातील तितावी पोलीस स्टेशन परिसरातील पानिपत-खतिमा रस्त्यावर त्रिदेव हॉटेलजवळ रस्त्याच्या कडेला उभ्या असलेल्या ट्रकला कारची धडक झाली. या अपघातात महेंद्र यांचा मुलगा पियुष, महेंद्रची पत्नी मोहिनी, सुनीलची पत्नी अंजू, राजेंद्रची पत्नी बिन्नी आणि कार चालक शिवा, जो पानिपतचा रहिवासी आहे, हे ठार झाले. महेंद्र यांचा मुलगा हार्दिक जखमी झाला. हे सर्वजण हरियाणाचे रहिवासी आहेत.

जिल्हा दंडाधिकारी आणि वरिष्ठ पोलीस अधीक्षक यांनी घटनास्थळाची पाहणी केली. एसएसपींनी सांगितले की, आज एक दुःखद अपघात झाला. सकाळी ७ वाजण्याच्या सुमारास, कुटुंब अस्थी विसर्जन करण्यासाठी कारने हरिद्वारला जात होते. त्रिदेव हॉटेलजवळ एक ट्रक उभा होता. कार त्या ट्रकला धडकली. कारचा टायर फुटल्याचे माहिती आहे. चालक ट्रकसह फरार आहे.

एसएसपींनी सांगितले की, गुन्हा दाखल करण्यात आला आहे आणि कारवाई केली जात आहे. हा निश्चितच निष्काळजीपणा आहे, ते म्हणाले. वाहने रस्त्याच्या कडेला उभी राहणार नाहीत याची खात्री करणे ही ढाबा चालकांचीही जबाबदारी आहे.

---------------

हिंदुस्थान समाचार / वृषाली देशपांडे