नवी दिल्ली, 12 ऑक्टोबर (हिं.स.)। नागरी विमान वाहतूक महासंचालनालयाने (डीजीसीए) पायलट प्रशिक्षणासाठी अयोग्य फ्लाइट सिम्युलेटर वापरल्याबद्दल इंडिगो एअरलाइन्सवर ४० लाखांचा दंड ठोठावला आहे. तपासात आढळले की कालिकत, लेह आणि काठमांडू सारख्या श्रेणी क विमानतळांवर नियमांनुसार विहित सिम्युलेटरवर सुमारे १,७०० वैमानिकांना प्रशिक्षण देण्यात आले नव्हते. डीजीसीएने ११ ऑगस्ट २०२५ रोजी प्रशिक्षण संचालकांना कारणे दाखवा नोटीस बजावली होती, आणि इंडिगोने २२ ऑगस्ट रोजी उत्तर दिले, परंतु ते असमाधानकारक ठरल्यामुळे दंडाची कारवाई करण्यात आली.

इंडिगोने चेन्नई, दिल्ली, बंगळुरू, ग्रेटर नोएडा, गुरुग्राम आणि हैदराबाद येथे २० सिम्युलेटरवर प्रशिक्षण दिले होते. हे सिम्युलेटर सीएई सिम्युलेशन ट्रेनिंग प्रायव्हेट लिमिटेड (सीएसटीपीएल), फ्लाइट सिम्युलेशन टेक्निक्स सेंटर (एफएसटीसी), एएजी सेंटर फॉर एव्हिएशन ट्रेनिंग (एसीएटी) आणि एअरबस सारख्या कंपन्यांकडून होते, परंतु हे सिम्युलेटर श्रेणी क विमानतळांसाठी पात्र नव्हते.

डीजीसीएने फ्लाइट ऑपरेशन्स डायरेक्टर आणि कंपनीला प्रत्येकी २० लाखांचा दंड ठोठावला. श्रेणी क विमानतळांवर लँडिंग करणे आव्हानात्मक असल्यामुळे या ठिकाणी विशेष सिम्युलेटर प्रशिक्षण आवश्यक आहे. डीजीसीएने म्हटले की प्रशिक्षण संचालक सर्व नियमांचे पालन सुनिश्चित करण्यात अयशस्वी ठरले, आणि यासाठी फ्लाइट ऑपरेशन्स डायरेक्टर देखील जबाबदार होता. १९३७ च्या विमान नियमांनुसार दोघांनाही प्रत्येकी २० लाखांचा दंड ठोठावण्यात आला असून, ही रक्कम ३० दिवसांच्या आत जमा करावी लागणार आहे. या कालावधीत न भरल्यास अधिक कठोर कारवाई होऊ शकते. इंडिगोला ह्या निर्णयाविरुद्ध नागरी विमान वाहतूक संयुक्त महासंचालकांकडे अपील करण्याचा अधिकार आहे.

---------------

हिंदुस्थान समाचार / Suraj Chaugule