मिस्र, 14 ऑक्टोबर (हिं.स.)।पाकिस्तानचे पंतप्रधान शाहबाज शरीफ यांनी गाझा शांतता शिखर परिषदेत अमेरिकेचे राष्ट्राध्यक्ष डोनाल्ड ट्रम्प यांचे कैतुक करत त्यांना नोबेल शांतता पुरस्कारासाठी नामांकित करण्याची इच्छा व्यक्त केली. मात्र शरीफ यांनी केलेलं कौतुक ऐकून मागे उभ्या असलेल्या इटलीच्या पंतप्रधान जॉर्जिया मेलोनी यांचे हावभाव सोशल मीडियावर आता व्हायरल झाले आहेत.

इजिप्तच्या शर्म अल-शेख येथे आयोजित गाझा शांतता शिखर परिषदेत पाकिस्तानचे पंतप्रधान शाहबाज शरीफ यांनी अमेरिकेचे राष्ट्राध्यक्ष डोनाल्ड ट्रम्प यांची केलेली स्तुती अनेक जागतिक नेत्यांसाठी आश्चर्याचा विषय ठरली. शरीफ यांनी ट्रम्प यांना 'शांतता प्रस्थापित करणारे' म्हणून गौरव केला आणि भारत-पाकिस्तान संघर्ष थांबवण्यात योगदान दिल्याबद्दल त्यांचे कौतुक केले. यावेळी शाहबाज शरीफ यांनी ट्रम्प यांना पुन्हा नोबेल शांतता पुरस्कारासाठी नामांकित करण्याची इच्छा व्यक्त केली. मला खरंच वाटतं की ते शांतता पुरस्कारासाठी सर्वात खरे आणि सर्वात अद्भुत उमेदवार आहेत, असे शाहबाज शरीफ म्हणाले.

शरीफ यांच्या कौतुकामुळे व्यासपीठावर उपस्थित असलेल्या इटलीच्या पंतप्रधान जॉर्जिया मेलोनी यांनी तोंडावर हात ठेवून आश्चर्य व्यक्त केल्याचे पाहायला मिळाले. डोनाल्ड ट्रम्प शांतता प्रस्थापित करण्यासाठी अथक प्रयत्न करत आहेत. त्यांनी भारत-पाकिस्तान संघर्ष थांबविण्यासाठीही चांगले योगदान दिले. त्यांना नोबेल शांतता पुरस्कार मिळायला हवा होता. आम्ही पुन्हा एकदा त्यांना नोबेल मिळण्यासाठी प्रस्ताव पाठवू, असं शरीफ म्हणाले. शरीफ यांचे विधान ऐकून जॉर्जिया मेलोनी यांनी तोंडावर हात ठेवला आणि त्यांच्या चेहऱ्यावरचे हावभाव बदलले.

शाहबाज शरीफ यांच्या भाषणाने ट्रम्प भारावून गेले. ट्रम्प यांनी लगेच मिश्किलपणे सांगितले, वाह! मला याची अपेक्षा नव्हती. चला घरी जाऊया, मला आता काही बोलायचं नाहीये. सगळ्यांना अलविदा. हे खरोखर सुंदरपणे सादर केले गेले, खूप खूप धन्यवाद. या परिषदेला २० हून अधिक जागतिक नेते उपस्थित होते.

---------------

हिंदुस्थान समाचार / Priyanka Bansode