क्वालालंपूर, 15 ऑक्टोबर (हिं.स.)भारत आणि पाकिस्तानमधील क्रीडा स्पर्धा दशकांपूर्वीची असली तरी, सुलतान ऑफ जोहोर कप हॉकी स्पर्धेत दोन्ही देशांच्या खेळाडूंनी क्रीडाभावनेचे एक नवीन उदाहरण मांडले. ज्युनियर हॉकी सामन्यापूर्वी दोन्ही देशांचे राष्ट्रगीत वाजल्यानंतर लगेचच भारतीय खेळाडूंनी पाकिस्तानी खेळाडूंसोबत हाय-फाइव्ह केले. सामना ३-३ असा बरोबरीत संपला. त्यानंतर दोन्ही संघांचे खेळाडू हस्तांदोलन करताना दिसले.

हे दृश्य खास होते कारण काही आठवड्यांपूर्वी झालेल्या आशिया कप क्रिकेट स्पर्धेत दोन्ही देशांच्या खेळाडूंमध्ये असे कोणतेही दृश्य दिसले नव्हते. आशिया कप क्रिकेट स्पर्धेत भारताचे नेतृत्व सूर्यकुमार यादव यांनी केले होते आणि त्या काळात भारतीय संघाने पाकिस्तानशी हस्तांदोलन करण्यास नकार दिला होता. ऑपरेशन सिंदूर आणि पहलगाम दहशतवादी हल्ल्यातील बळींच्या कुटुंबीयांना आदर दाखवण्यासाठी हा निर्णय घेण्यात आला. भारताने अंतिम सामन्यात पाकिस्तानला पराभूत करत ट्रॉफी जिंकली. पण तरीही, टीम इंडियाने पीसीबी प्रमुख मोहसीन नक्वी, जे पाकिस्तानचे गृहमंत्री देखील आहेत, यांच्याकडून ट्रॉफी स्वीकारण्यास नकार दिला. यावरून स्पष्ट होते की, मैदानाबाहेरील राजनैतिक तणाव क्रिकेट मैदानावर जाणवत होता. सुलतान ऑफ जोहर कप हॉकी स्पर्धेतील वातावरण अगदी वेगळे होते. सामन्यापूर्वी, पाकिस्तान हॉकी फेडरेशनने त्यांच्या खेळाडूंना भारतीय खेळाडूंशी कोणताही तणाव किंवा संघर्ष टाळण्याचे आणि केवळ त्यांच्या खेळावर लक्ष केंद्रित करण्याचे निर्देश दिले होते. एका वरिष्ठ अधिकाऱ्याने स्पष्ट केले की, खेळाडू मानसिकदृष्ट्या तयार होते की, जर भारतीय खेळाडूंनी हस्तांदोलन केले नाही तर त्यांनी त्याकडे दुर्लक्ष करावे आणि फक्त पुढे जावे. त्यांना कोणत्याही भावनिक प्रतिक्रिया किंवा हावभाव टाळण्याच्या सूचना देण्यात आल्या होत्या. पण मैदानावर उलट परिस्थिती दिसून आली, सामन्यापूर्वी आणि नंतर दोन्ही संघांच्या खेळाडूंनी एकमेकांबद्दल आदर आणि सौहार्दची भावना दाखवली. भारत आणि पाकिस्तानमधील हा हॉकी सामना केवळ 3-3 असा रोमांचक बरोबरीचा नव्हता तर खिलाडूवृत्तीचे एक उदाहरणही दिसून आले.

---------------

हिंदुस्थान समाचार / वृषाली देशपांडे