नवी दिल्ली, 15 ऑक्टोबर (हिं.स.)भारतीय संघ ऑस्ट्रेलियाला रवाना झाला आहे. टीम इंडियाचे काही क्रिकेटपटू दिल्ली विमानतळावर दिसले. यामध्ये माजी कर्णधार रोहित शर्मा आणि विराट कोहली यांचाही समावेश आहे. या दोन्ही क्रिकेटपटूंची एक झलक पाहण्यासाठी दिल्ली विमानतळावर मोठी गर्दी जमली होती.

विमानतळावर बसमधून उतरल्यानंतर रोहितने एका चाहत्याला ऑटोग्राफ दिला. विराट, रोहित आणि श्रेयस बसमध्ये एकत्र बसलेले दिसले. पण बसमधून फारसे क्रिकेटपटू उतरताना दिसले नाहीत. विमानतळावर दिसणाऱ्या क्रिकेटपटूंमध्ये रोहित, विराट आणि श्रेयससह कर्णधार शुभमन गिल, ध्रुव जुरेल, यशस्वी जैसल, हर्षित राणा, केएल राहुल, वॉशिंग्टन सुंदर, अर्शदीप सिंग, नितीश रेड्डी आणि प्रसिद्ध कृष्ण यांचा समावेश आहे.

या मालिकेसाठी शुभमन गिलला कर्णधारपद देण्यात आले आहे. तो आता कसोटी मालिकेनंतर एकदिवसीय संघाचे नेतृत्व करेल. रोहित शर्माला कर्णधारपदावरून मुक्त करण्यात आले आहे आणि तो सलामीवीर म्हणून खेळेल. पण २०२७ च्या एकदिवसीय विश्वचषकात कोहली आणि रोहित दोघांच्याही सहभागाबद्दल शंका आहेत. येत्या काही वर्षांत भारत तुलनेने कमी ५० षटकांचे सामने खेळणार आहे.

एकदिवसीय मालिकेत विराट कोहली आणि रोहित शर्माची जोडी पुन्हा एकत्र येईल. २०२४ चा टी२० विश्वचषक जिंकल्यानंतर दोन्ही क्रिकेटपटूंनी टी२० आंतरराष्ट्रीय क्रिकेटमधून निवृत्ती घेतली. त्यानंतर लवकरच त्यांनी कसोटी क्रिकेटमधूनही निवृत्ती घेतली. आता, दोघेही फक्त एकदिवसीय क्रिकेटमध्ये सक्रिय आहेत. त्यांच्या पुनरागमनामुळे भारतीय चाहत्यांमध्ये मोठा उत्साह निर्माण झाला आहे.

पहिला एकदिवसीय सामना पर्थमध्ये खेळला जाणार आहे. त्यानंतर २३ ऑक्टोबर रोजी ऍडलेडमध्ये दुसरा एकदिवसीय सामना आणि २५ ऑक्टोबर रोजी सिडनीमध्ये तिसरा एकदिवसीय सामना होईल. त्यानंतर पाच सामन्यांची टी२० मालिका होईल. हे सामने २९, ३१ ऑक्टोबर, २, ६ आणि ८ नोव्हेंबर रोजी खेळवले जाणार आहेत.

---------------

हिंदुस्थान समाचार / वृषाली देशपांडे