रत्नागिरी, 16 ऑक्टोबर, (हिं. स.) : इतिहास संशोधक आणि शिवचरित्रकार विजयराव देशमुख तथा सद्गुरूदास महाराज यांनी चिपळूणच्या लोकमान्य टिळक स्मारक वाचन मंदिराला भेट दिली. पत्रभेट दिवाळी अंकाच्या प्रकाशनासाठी महाराज चिपळूणला आले होते.

वाचनालयातर्फे सहकार्यवाह विनायक ओक यांनी त्यांचे स्वागत केले व ग्रंथालयाने साकारलेले रामभाऊ साठे संग्रहालय दाखविले. सद्गुरूदास महाराजांची प्रकृती फारशी बरी नसतानाही प्रत्येक वस्तू आणि तिचा इतिहास जाणून घेतला. त्यानंतर त्यांनी बाळशास्त्री जांभेकर सभागृहातील तैलचित्रे पाहिली. संस्थेचे कार्याध्यक्ष अरुण इंगवले यांनी संस्थेच्या वतीने उपरणे देऊन व विनायक ओक यांनी तेजशलाका हा ग्रंथ देऊन सद्गुरूंचा सत्कार केला. इंगवले यांनी मनोगत व्यक्त करताना सद्गुरूदास महाराजांनी लिहिलेल्या शिवचरित्राच्या शेवटी दिलेल्या परिशिष्टांचा गौरवपूर्ण उल्लेख केला. या परिशिष्टांमुळे हे शिवचरित्र अक्षरधन झाल्याचे सांगितले.

यावेळी सौ. अर्चना बक्षी, संस्थेचे कर्मचारी व सद्गुरूंचे शिष्य मोठ्या संख्येने उपस्थित होते.

---------------

हिंदुस्थान समाचार / रत्नागिरी