मुंबई, 19 ऑक्टोबर (हिं.स.)। विवोने भारतातील वापरकर्त्यांसाठी ओरिजिनओएस 6 या नवीन सॉफ्टवेअर अपडेटचा रोलआउट जाहीर केला आहे. अँड्रॉइड 16 आधारित हे अपडेट नोव्हेंबरपासून विवो X200 मालिकेपासून सुरू होईल आणि 2026 च्या पहिल्या सहामाहीपर्यंत टप्प्याटप्प्याने इतर मॉडेल्सना उपलब्ध होईल. कंपनीने ओरिजिन स्मूथ इंजिनसह सुधारित कार्यक्षमता आणि अनेक नाविन्यपूर्ण वैशिष्ट्यांसह हे अपडेट सादर केले आहे, जे फनटच ओएस 15 ची जागा घेईल.

ओरिजिनओएस 6 ची लाँचिंग चीनमध्ये 10 ऑक्टोबर रोजी विवो डेव्हलपर कॉन्फरन्समध्ये झाली होती, तर भारतात हे अपडेट नोव्हेंबरपासून सुरू होईल. रोलआउटच्या पहिल्या टप्प्यात नोव्हेंबरच्या सुरुवातीला व्हिवो X200 मालिका, X फोल्ड 5 आणि V60 यांना अपडेट मिळेल. नोव्हेंबरच्या मध्यात X100 मालिका आणि X फोल्ड 3 प्रो, तर डिसेंबरमध्ये V60e, V50, V50e, T4 अल्ट्रा, T4 प्रो आणि T4R 5G यांना अपडेट मिळणार आहे. 2026 च्या पहिल्या सहामाहीत X90, V40, V30, T4 5G, T4x 5G, T3, Y400, Y300 5G, Y200, Y100, Y100A, Y58 5G आणि Y39 5G मालिकांनाही अपडेट उपलब्ध होईल.

ओरिजिनओएस 6 मध्ये ओरिजिन स्मूथ इंजिन वापरकर्त्यांना अधिक गती आणि कार्यक्षमता प्रदान करेल. कंपनीच्या मते, हे अपडेट 5,000 फोटोंचा अल्बम काही सेकंदात उघडू शकते आणि डेटा लोडिंगची गती 106 टक्क्यांनी वाढवते. याशिवाय, ड्युअल-रेंडरिंग आर्किटेक्चरमुळे कार्यक्षमता सुधारते, तर नवीन यूजर इंटरफेसमध्ये “सॉफ्ट स्प्रिंग इफेक्ट” आणि डायनॅमिक ॲप आयकॉन्स यांचा समावेश आहे. मॉर्फिंग ॲनिमेशन्स, वन-शॉट ॲनिमेशन्स, लाइट अँड शॅडो स्पेस आणि डायनॅमिक ग्लो सिस्टम लाइटिंगसारखी वैशिष्ट्येही या अपडेटमध्ये आहेत.

विवोने 40 हून अधिक भाषांसाठी सपोर्ट असलेला व्हिवो सन्स फॉन्ट सादर केला आहे. ओरिजिन आयलँड वैशिष्ट्य स्मार्ट सूचना आणि लाइव्ह ॲक्टिव्हिटी माहिती देईल. यामध्ये म्युझिक कंट्रोल्स, कॉपी केलेले फोन नंबरसह कॉल किंवा मेसेज शॉर्टकट, मीटिंग तपशील एका टॅपनं “जॉइन” करण्याची सुविधा आहे. तसेच हे अपडेट ॲपल डिव्हाइसेसशी कनेक्ट होण्यास सक्षम आहे, ज्यामुळे वापरकर्त्यांना एकसंध अनुभव मिळेल.

विवोचे ओरिजिनओएस 6 अपडेट भारतातील वापरकर्त्यांसाठी महत्त्वपूर्ण आहे. सुधारित कार्यक्षमता, नवीन डिझाइन आणि स्मार्ट फीचर्ससह हे अपडेट स्मार्टफोनचा अनुभव अधिक समृद्ध करेल. नोव्हेंबरपासून सुरू होणारे रोलआउट 2026 पर्यंत पूर्ण होईल, ज्यामुळे वापरकर्त्यांना नवीन तंत्रज्ञानाचा लाभ घेता येईल.

---------------

हिंदुस्थान समाचार / Suraj Chaugule