इस्लामाबाद , 23 ऑक्टोबर (हिं.स.)।पाकिस्तानच्या बलुचिस्तान प्रांतात गेल्या २४ तासांत झालेल्या वेगवेगळ्या घटनांमध्ये दोन पोलिसांसह तीन सुरक्षा जवान आणि अकरा दहशतवादी ठार झाले आहेत. माहितीनुसार, नोशकी भागात गस्तीदरम्यान दोन पोलिस कर्मचाऱ्यांवर अज्ञात हल्लेखोरांनी गोळीबार केला आणि गोळीबारानंतर हल्लेखोर तेथून पळून गेले.

एका दुसऱ्या घटनेत, केच परिसरात भूसुरुंग फुटल्याने एका सुरक्षा अधिकाऱ्याचा मृत्यू झाला आहे. सुरक्षा दलांनी चगाई आणि सिबी जिल्ह्यांमध्ये गुप्त माहितीनुसार कारवाया सुरू केल्या. या ऑपरेशन्स दरम्यान झालेल्या तीव्र चकमकीत ११ संशयित दहशतवादी ठार झाल्याचे सांगण्यात आले आहे.

अधिकाऱ्यांनी सांगितले की, दहशतवाद्यांच्या हालचालींची माहिती मिळाल्यानंतर सैन्याने चगाईच्या दलबंदिन परिसरातील डोंगराळ भागाला वेढा घातला. संशयितांनी सैन्यावर गोळीबार सुरू केला. दरम्यान, सिबीमध्ये अँटी-टेररिझम विभागाने एका कंपाउंडवर छापा टाकला, जिथे प्रतिबंधित संघटनेचे सदस्य लपलेले होते. थोड्याच वेळात झालेल्या चकमकीत पाच दहशतवादी ठार झाले आणि तीन जणांना अटक करण्यात आली आहे.

अधिकाऱ्यांनी सांगितले की, दोन्ही ठिकाणांहून मोठ्या प्रमाणात शस्त्रास्त्र जप्त करण्यात आली आहेत. त्यांच्या मते, ठार झालेले दहशतवादी यापूर्वीही सुरक्षा दलांवर, पोलिसांवर आणि लेवी फोर्सवर झालेल्या हल्ल्यांमध्ये सहभागी होते. सर्व मृतदेह ओळख पटवण्यासाठी जवळच्या रुग्णालयात पाठविण्यात आले आहेत.

---------------

हिंदुस्थान समाचार / Priyanka Bansode