जळगाव, 5 ऑक्टोबर, (हिं.स.) फसवणुकीच्या नवनवीन पद्धती वापरून नागरिकांना गंडा घालणाऱ्या सायबर गुन्हेगारांचे प्रमाण वाढले आहे. अशात जळगावातील एका ट्रान्सपोर्ट व्यावसायिकाची कोणताही ओटीपी न कळविता अथवा लिंकला क्लिक न करताही तीन लाख ६६ हजार ८९३ रुपयांमध्ये फसवणूक करण्यात आली. पाच वेळा ही रक्कम त्यांच्या बँक खात्यातून परस्पर ट्रान्सफर झाली. या प्रकरणी एमआयडीसी पोलिस ठाण्यात अज्ञाताविरुद्ध गुन्हा दाखल करण्यात आला आहे.

पोलीस सूत्रानुसार, मांगीलाल पारिक यांचा ट्रान्सपोर्ट नगरात पूजा रोड कॅरियर नावाचा ट्रान्सपोर्टचा व्यवसाय असून, त्यांचे खासगी बँकेत खाते आहे. दि. २९ सप्टेंबर रोजी त्यांच्या मोबाइलवर बँक खात्यातून ९९ हजार ८०० रुपये काढल्याचा मेसेज आला. त्यांनी याबाबत मुलाला विचारणा केली असता, त्याने कुठलाही व्यवहार केला नसल्याचे सांगितले. त्यानंतर एकापाठोपाठ रक्कम काढल्याचे मेसेज आले. मेसेजच्या त्या माध्यमातून पारिक यांच्या बँक खात्यातून एकूण तीन लाख ६६ हजार ८९३ रुपये काढल्याचे समजले. त्यावेळी ते लगेच बँकेत गेले व शाखा व्यवस्थापकाला माहिती दिली. खात्याचा तपशील पाहून ही रक्कम नेमकी कोठे वर्ग झाली याबाबत सांगता येणार नसल्याचे व्यवस्थापकांनी सांगितले.

---------------

हिंदुस्थान समाचार / मनोहर कांडेकर