ढाका, 18 नोव्हेंबर (हिं.स.)आशियाई तिरंदाजी अजिंक्यपद स्पर्धेतून परतणाऱ्या भारतीय तिरंदाजी संघातील अकरा सदस्य सोमवारी रात्री ढाक्यात जवळजवळ १० तास अडकले होते. त्यापैकी दोन अल्पवयीन मुले होती. त्यांच्या विमान उड्डाणाला वारंवार विलंब होत होता. या दरम्यान, त्यांना ढाक्याच्या हिंसाचारग्रस्त रस्त्यांवरून स्थानिक बसमधून विनाएस्कॉर्टेड नेण्यात आले आणि नंतर त्यांना एका जीर्ण धर्मशाळेत ठेवण्यात आले.

एअरलाइनने कोणतीही मदत केली नाही. ज्या धर्मशाळेत त्यांना ठेवण्यात आले होते तिथे सहा बेड असलेली एक खोली आणि फक्त एक घाणेरडे शौचालय होते, ज्यामुळे आंघोळ करणे कठीण होत होते. संघात ज्येष्ठ खेळाडू अभिषेक वर्मा, ज्योती सुरेखा आणि ऑलिंपियन धीरज बोम्मदेवरा यांचा समावेश होता. ते शनिवारी रात्री ९:३० वाजता दिल्लीला जाणारे विमान पकडण्यासाठी ढाका विमानतळावर पोहोचले. पण विमानात चढल्यानंतर त्यांना सांगण्यात आले की, तांत्रिक समस्येमुळे विमान उड्डाण करू शकत नाही.

कठीण परिस्थितीत संघाला पाठिंबा न दिल्याबद्दल अभिषेक वर्मा यांनी एअरलाइनवर आरोप केले. त्यांनी विचारले, विमान बिघडले असताना आणि बाहेर दंगली सुरू असताना आम्हाला लोकल बसमध्ये कसे पाठवण्यात आले? जर आम्हाला काही झाले असते तर जबाबदारी कोणी घेतली असती?

वर्मा पुढे म्हणाले, जर आम्हाला सकाळी ११ वाजेपर्यंत नवीन तिकिटे मिळतील हे माहित असते, तरी आम्ही विमानतळावरच थांबणे पसंत केले असते कारण एअरलाइनने आम्हाला कोणतीही स्पष्ट माहिती दिली नव्हती.दुसऱ्या दिवशी सकाळी, टीम सकाळी ७ वाजता विमानतळावर रवाना झाली. पण दिल्लीत पोहोचल्यानंतरही त्रास सुरूच राहिला. विलंबामुळे, अनेक तिरंदाज हैदराबाद आणि विजयवाडाला जाणाऱ्या त्यांच्या कनेक्टिंग फ्लाइट चुकल्या. त्यांना त्यांचा प्रवास सुरू ठेवण्यासाठी शेवटच्या क्षणी महागडी तिकिटे खरेदी करावी लागली.

---------------

हिंदुस्थान समाचार / वृषाली देशपांडे