पक्षातर्फे सर्व 50 जागांवर उमेदवार देण्याची तयारी

पणजी,22 नोव्हेंबर (हिं.स.) : गोव्यातील आगामी जिल्हा पंचायत (झेड.पी) निवडणुकांसाठी आम आदमी पार्टीने (आप) 22 उमेदवारांची पहिली यादी जाहीर केली असून, पक्षाने सर्व 50 जागांवर उमेदवार उतरवण्याची घोषणा केली आहे. या हालचालीमुळे राज्यातील ग्रामीण भागातील राजकीय समीकरणांमध्ये चैतन्य आल्याचे निरीक्षकांचे मत आहे.

पक्षाने प्रसिद्ध केलेल्या पहिल्या यादीत युवक, महिला, सामाजिक कार्यकर्ते आणि विविध समुदायांचे प्रतिनिधी अशा संतुलित गटाचा समावेश असल्याचे सांगण्यात आले. ‘स्वच्छ राजकारण आणि स्थानिक स्वराज्य संस्थांना सक्षम करणे’ हा पक्षाचा मुख्य अजेंडा असल्याचा दावा आप ने केला आहे.गोव्यात गेल्या काही वर्षांपासून संघटनात्मक पातळीवर तयारी सुरू असल्याचे आप ने नमूद केले असून, या निवडणुकीत पक्ष पहिल्यांदाच सर्व जागांवर लढण्याच्या भूमिकेत आहे. पक्ष नेतृत्वाच्या मते, पंचायत स्तरावर पाणी, वीज, रस्ते, आरोग्य सुविधा आणि पारदर्शक कारभाराशी संबंधित मुद्दे या उमेदवारांची प्राथमिकता असणार आहेत.

दरम्यान, राज्यातील भाजप सरकारबद्दल वाढत्या नाराजीच्या पार्श्वभूमीवर आपची ही मोहीम पाहिली जात आहे. महागाई, ग्रामीण भागातील रोजगाराच्या संधी आणि पंचायतांच्या अधिकारांबाबत नागरिकांनी सातत्याने प्रश्न उपस्थित केल्याचे राजकीय विश्लेषकांचे म्हणणे आहे. भाजपकडून मात्र या टीकांवर अद्याप अधिकृत प्रतिक्रिया आलेली नाही.राज्य निवडणूक प्रक्रियेची घोषणा जवळ येत असताना, आपच्या पहिल्या उमेदवार यादीमुळे आगामी झेडपी निवडणूक अधिक स्पर्धात्मक होण्याची चिन्हे दिसत आहेत. पुढील काही दिवसांत उर्वरित उमेदवारांची घोषणा होण्याची शक्यता आहे.

------------------------

हिंदुस्थान समाचार / मनीष कुलकर्णी