पाटणा , 23 नोव्हेंबर (हिं.स.)।पंतप्रधान नरेंद्र मोदी, मुख्यमंत्री नितीश कुमार आणि गायिका मैथिली ठाकुर यांच्याबद्दल इंस्टाग्रामवर आक्षेपार्ह पोस्ट करणारा आरोपी पंकज कुमार यादव याला गुजरात पोलिसांनी जामनगर येथून अटक केली आहे. अटकेची पुष्टी करताना एसएसपी जगन्नाथ रेड्डी यांनी सांगितले की दरभंगा सायबर पोलिसांची टीम त्याला घेण्यासाठी रवाना झाली आहे.

दरभंगा पोलिसांच्या माहितीनुसार, पंकज कुमार यादव हा बहेडी ठाण्यातील उजैना गावचा रहिवासी आहे. शुक्रवारी सकाळी त्याने “Pankaj Yadav Official” या नावाच्या इंस्टाग्राम आयडीवरून पंतप्रधान, मुख्यमंत्री आणि मैथिली ठाकुर यांचे आक्षेपार्ह फोटो व रील तयार करून सोशल मीडियावर टाकले आणि ते लगेचच व्हायरल झाले. रील व्हायरल होताच दरभंगाचे एसएसपी जगन्नाथ रेड्डी यांनी तत्काळ कारवाई करत सायबर पोलिस स्टेशन प्रमुखांना एफआयआर नोंदवण्याचे आदेश दिले.

सायबर पोलीस प्रमुखांच्या निवेदनावरून शुक्रवारी रात्री एफआयआर नोंदवून कारवाई सुरू करण्यात आली. इंस्टाग्राम आयडीचे लोकेशन ट्रेस केल्यानंतर दरभंगा पोलिसांनी गुजरात पोलिसांशी संपर्क साधला आणि माहिती दिली. लोकेशन मिळताच जामनगर पोलिसांनी त्याला अटक केली. अटकेची पुष्टी सायबर डीएसपी विपिन बिहारी यांनी केली आहे.

सायबर डीएसपी विपिन बिहारी यांनी सांगितले की सोशल मीडियावर आक्षेपार्ह पोस्ट टाकल्यानंतर इंस्टाग्राम आयडीची तपासणी करून गुजरात पोलिसांच्या मदतीने त्याला अटक करण्यात आली आहे. आरोपी पंकज यादवला आणण्यासाठी पोलिसांची टीम पाठवण्यात आली आहे. दरभंगाला आणल्यानंतर त्याची सविस्तर चौकशी केली जाईल.

माहितीनुसार, पंकज कुमार यादव हा बहेडी क्षेत्रातील उजैना गावचा असून तो गुजरातमधील एका खाजगी कंपनीत नोकरी करतो. काही दिवसांपूर्वी वडिलांच्या निधनानंतर तो दरभंगाला आला होता आणि आर्थिक अडचणींमुळे पुन्हा गुजरातला परत गेला.

---------------

हिंदुस्थान समाचार / Priyanka Bansode