मुंबई, 23 नोव्हेंबर (हिं.स.)। गोवा मोटोव्हर्स 2025 मध्ये रॉयल एनफील्डनं आपल्या लोकप्रिय क्रूझर मोटरसायकल मेटिअर 350 ची नवी संडाउनर ऑरेंज स्पेशल एडिशन आवृत्ती भारतात अधिकृतपणे लॉंच केली आहे. ही खास मोटरसायकल 2.18 लाख रुपये (एक्स-शोरूम) किंमतीत उपलब्ध असून स्टँडर्ड मेटिअर 350 पेक्षा तब्बल 27,649 रुपये जास्त किमतीची आहे. नवीन एडिशनसाठी बुकिंगची सुरुवात 22 नोव्हेंबर 2025 पासून करण्यात आली आहे.

नवीन संडाउनर ऑरेंज एडिशनला एकदम वेगळी, आकर्षक आणि प्रीमियम रंगसंगती देण्यात आली आहे. स्टँडर्ड मॉडेलमध्ये फायरबॉल ऑरेंज, ग्रे, स्टेलर मॅट ग्रे, स्टेलर मरिन ब्ल्यू, ऑरोरा ग्रीन, ऑरोरा रेड आणि सुपरनोव्हा ब्लॅक यांसारखे अनेक पर्याय उपलब्ध असले तरी ही स्पेशल एडिशन फक्त संडाउनर ऑरेंज या एकाच विशेष रंगात मिळणार आहे.

या एडिशनमध्ये क्रूझर रायडिंगसाठी आवश्यक अ‍ॅक्सेसरीज फॅक्टरी-फिटेड स्वरूपात दिल्या आहेत. यात टूरिंग सीट, फ्लायस्क्रीन (विंडशील्ड), पॅसेंजर बॅकरेस्ट आणि ट्रिपर नेव्हिगेशन पॉड यांचा समावेश आहे. याशिवाय अ‍ॅल्युमिनियम ट्यूबलेस स्पोक व्हील्स, स्लिप-अँड-असिस्ट क्लच, अ‍ॅडजस्टेबल लिव्हर्स, पूर्ण एलईडी हेडलॅम्प आणि यूएसबी टाइप-सी फास्ट चार्जिंग पोर्ट अशी प्रिमियम वैशिष्ट्येही मिळतात. या सर्वांमुळे लांब अंतराच्या टूर्स आणखी आरामदायी आणि सोयीस्कर होतील.

इंजिन आणि परफॉर्मन्सच्या दृष्टीने कोणताही बदल करण्यात आलेला नाही. यामध्ये 349 सीसी, सिंगल-सिलेंडर, एअर-कूल्ड इंजिन देण्यात आलं असून ते 20.2 एचपी पॉवर आणि 27 एनएम टॉर्क निर्माण करतं. पाच-स्पीड गिअरबॉक्ससह ही मोटरसायकल स्मूथ, स्टेबल आणि आनंददायी राइडिंग अनुभव प्रदान करते. सस्पेन्शन, चेसिस आणि ब्रेकिंग सिस्टीमही स्टँडर्ड मॉडेलप्रमाणेच आहे.

भारतातील लोकप्रिय क्रूझर मोटरसायकल श्रेणीत मेटिअर 350 ने आधीच महत्त्वाचं स्थान मिळवलं असून या नवीन स्पेशल एडिशनमुळे ग्राहकांना अधिक प्रीमियम आणि स्टायलिश पर्याय उपलब्ध झाला आहे. विशेषतः लांब पल्ल्याच्या प्रवासासाठी अ‍ॅक्सेसरीजसह तयार असलेली ही मोटरसायकल टूरिंग रायडर्ससाठी आदर्श ठरणार आहे. मोटोव्हर्स 2025 मध्ये झालेल्या या लॉंचमुळे रॉयल एनफील्ड चाहत्यांमध्ये मोठा उत्साह पाहायला मिळत आहे आणि ही बाइक लवकरच देशभरातील डीलरशिपवर उपलब्ध होणार आहे.

---------------

हिंदुस्थान समाचार / Suraj Chaugule