जळगाव, 24 नोव्हेंबर (हिं.स.) | शहरातील एमआयडीसी परिसरात असणाऱ्या ढोर बाजार परिसरात अज्ञात चोरट्यांनी मध्यरात्रीच्या सुमारास सात दुकानांना लक्ष्य करीत रोख रकमेसह लाखो रुपयांचा ऐवज चोरून नेल्याचा प्रकार सोमवारी सकाळी उघडकीस आला असून त्यामुळे व्यापारी वर्गात मोठी खळबळ उडाली आहे.

घटनेची माहिती कळताच उपविभागीय पोलिस अधिकारी नितीन गणापुरे, पोलिस निरीक्षक बबन आव्हाड यांच्यासह एमआयडीसी पोलीस स्टेशनच्या पथकाने धाव घेऊन पाहणी करून पुढील कारवाईला सुरुवात केली आहे. दरम्यान अज्ञात चोरट्यांनी किती रुपयांचा ऐवज लंपास केला याची अद्याप माहिती मिळू शकलेली नाही.

याबाबत सूत्रांनी दिलेली माहिती अशी की, काशिनाथ लॉज मागे असणाऱ्या एमआयडीसीतील ढोर बाजार येथे बी सेक्टर मध्ये सात दुकानांचे शटर उचकटवून अज्ञात चोरट्यांनी दुकानांमधून रोकड आणि मुद्देमाल लंपास केल्याचा प्रकार सकाळी उघडकीस आल्यामुळे खळबळ उडाली असून व्यापाऱ्यांमध्ये घबराट निर्माण झाले आहे. दरम्यान घटनेची माहिती कळताच एमआयडीसीचे पोलिसांनी घटनास्थळी धाव घेऊन पाहणी केली.

---------------

हिंदुस्थान समाचार / मनोहर कांडेकर