इस्लामाबाद , 24 नोव्हेंबर (हिं.स.)। पाकिस्तानच्या पेशावरमध्ये सोमवारी संघीय पोलिस दल (कॉन्स्टेबुलरी)च्या मुख्यालयावर हल्ला झाला. अहवालांनुसार मुख्यालयाजवळ अनेक स्फोटांचे आवाज ऐकू आले, ज्यानंतर परिसर तात्काळ रिकामा करण्यात आला. पाकिस्तानच्या सुरक्षा यंत्रणांच्या माहितीनुसार, या हल्ल्यात सहभागी असलेल्या आत्मघाती हल्लेखोरांना ठार करण्यात आले आहे. या घटनेत पोलिस दलाच्या तीन जवानांचा मृत्यू झाला असून दोन जण जखमी झाले आहेत.

पाकिस्तानी मीडिया रिपोर्टनुसार, हल्ला सकाळी सुमारे 8 वाजता सदर–कोहाट रोडवर झाला. प्रथम एका आत्मघाती हल्लेखोराने मुख्यालयाच्या गेटवरच स्वतःला उडवून दिले. त्यानंतर काही काळ गोळीबाराचे आवाजही ऐकू आले. या गोंधळात आणखी एक हल्लेखोर मुख्यालयात घुसण्याचा प्रयत्न करत होता, मात्र सुरक्षादलांनी त्याला ठार केले. यानंतर सुरक्षादलांनी संपूर्ण परिसराला वेढा घालून बचाव व मदतकार्य सुरू केले.

दरम्यान, पेशावरमधील सर्वात मोठ्या शासकीय रुग्णालय ‘लेडी रीडिंग हॉस्पिटल’मध्ये आपत्कालीन स्थिती जाहीर करण्यात आली. रुग्णालयाच्या प्रवक्त्याने सांगितले की सहा जखमींना येथे आणण्यात आले असून त्यांची प्रकृती स्थिर आहे.

ज्या संघीय पोलिस दलावर हल्ला झाला, ते नागरिक अर्धसैनिक दल असून याला यापूर्वी ‘फ्रंटियर कॉन्स्टेबुलरी’ म्हणून ओळखले जात होते. यावर्षी जुलै महिन्यात शहबाज शरीफ सरकारने या दलाचे नाव बदलून ‘फेडरल कॉन्स्टेबुलरी’ असे केले. पेशावरमधील या दलाचे मुख्यालय अतिशय गर्दीच्या भागात असून सैन्य छावणीदेखील त्याच्या अगदी जवळ आहे.

पाकिस्तानमध्ये मागील काही वर्षांत दहशतवादी हल्ल्यांत मोठी वाढ झाली आहे, विशेषतः खैबर पख्तूनख्वा आणि बलुचिस्तान प्रांतात. या वाढीमागील प्रमुख कारण म्हणजे दहशतवादी संघटना तहरीक-ए-तालिबान पाकिस्तान (टीटीपी) आणि पाकिस्तान सरकार यांच्यातील शांतता करार कोलमडणे होय.

---------------

हिंदुस्थान समाचार / Priyanka Bansode