दिसपूर, 25 नोव्हेंबर (हिं.स.)आसामचे मुख्यमंत्री हिमंता बिस्वा सरमा यांनी आसाम विधानसभेला माहिती दिली की, गायक झुबिन गर्ग यांची हत्या करण्यात आली आहे. सरमा यांनी विधानसभेत झुबिन यांच्या मृत्यूवरील चर्चेदरम्यान ही घोषणा केली. या चर्चेला परवानगी देण्यासाठी आज विरोधकांनी स्थगन प्रस्ताव मांडला होता. मुख्यमंत्र्यांच्या विनंतीवरून सभापतींनी हा प्रस्ताव स्वीकारला. या वर्षी १९ सप्टेंबर रोजी सिंगापूरमध्ये समुद्रात पोहताना गर्ग यांचा मृत्यू झाला. राज्य पोलिसांचे विशेष तपास पथक (एसआयटी) त्यांच्या मृत्यूच्या सभोवतालच्या परिस्थितीची चौकशी करत आहे. गर्ग यांच्या संशयास्पद परिस्थितीत झालेल्या मृत्यूची चौकशी करण्यासाठी आसाम सरकारने गुवाहाटी उच्च न्यायालयाच्या विद्यमान न्यायाधीशांच्या अध्यक्षतेखाली एक आयोगही स्थापन केला.

मंगळवारी विधानसभेचे कामकाज नुकतेच निधन झालेल्यांना श्रद्धांजली अर्पण करून सुरू झाले. कामकाज सुरू होताच, विरोधी पक्षनेते देबब्रत सैकिया आणि अपक्ष आमदार अखिल गोगोई यांनी या मुद्द्यावर स्थगन प्रस्तावासाठी परवानगी मागितली. सभापती विश्वजित दैमारी हे प्रस्तावाच्या मान्यतेवर बोलण्याची परवानगी देणार असतानाच मुख्यमंत्र्यांनी हस्तक्षेप केला आणि सांगितले की, सरकारलाही या प्रकरणाची जाणीव आहे. त्यांनी सभापतींना स्थगन प्रस्ताव स्वीकारण्याची विनंती केली. शर्मा यांनी असेही सांगितले की, सत्ताधारी पक्षाचा कोणताही सदस्य चर्चेत बोलणार नाही आणि फक्त सरकारच उत्तर देईल. गर्ग यांच्या मृत्यूच्या चौकशीत अडथळा निर्माण होऊ शकेल अशी कोणतीही टिप्पणी करू नये अशी विनंती त्यांनी सदस्यांना केली.

सोमवारी, झुबिन गर्ग यांच्या मृत्यूची चौकशी करणाऱ्या एक सदस्यीय आयोगाने जबाब नोंदवण्याची आणि पुरावे सादर करण्याची अंतिम मुदत १२ डिसेंबरपर्यंत वाढवली. न्यायमूर्ती सौमित्र सैकिया यांच्या अध्यक्षतेखालील आयोगाने ३ नोव्हेंबरपासून घटनेबाबत जबाब नोंदवणे आणि पुरावे गोळा करण्यास सुरुवात केली. आयोगाचे सदस्य सचिव अरुप पाठक यांनी सांगितले की, ही अंतिम मुदत मूळतः २१ नोव्हेंबर होती, परंतु आता ती १२ डिसेंबरपर्यंत वाढविण्यात आली आहे. त्यांनी माहिती दिली आहे की, १२ डिसेंबरपर्यंत, रविवार वगळता सर्व कामकाजाच्या दिवशी, सकाळी १०.३० ते दुपारी ४ वाजेपर्यंत, इच्छुक व्यक्ती नोटरीकृत प्रतिज्ञापत्राद्वारे त्यांचे म्हणणे सादर करू शकतात.

---------------

हिंदुस्थान समाचार / वृषाली देशपांडे