नवी दिल्ली , 11 डिसेंबर (हिं.स.)।रशियाचे राष्ट्राध्यक्ष व्लादिमीर पुतिन यांच्या भारत भेटीनंतर आज पंतप्रधान नरेंद्र मोदी यांनी अमेरिकेचे राष्ट्राध्यक्ष डोनाल्ड ट्रम्प यांच्याशी दूरध्वनीवर चर्चा केली. दोन्ही नेत्यांनी भारत-अमेरिका व्यापक जागतिक रणनीतिक भागीदारीत झालेल्या प्रगतीचा आढावा घेतला. तसेच व्यापार, महत्त्वपूर्ण तंत्रज्ञान, ऊर्जा, संरक्षण आणि सुरक्षा या क्षेत्रांमध्ये सहकार्य वाढवण्याबाबतही विचारविनिमय केला.
दोन्ही नेते सामायिक आव्हानांचे निराकरण करण्यासाठी आणि सामायिक हितसंबंध पुढे नेण्यासाठी एकत्र काम करण्यास सहमत झाले. त्यांनी द्विपक्षीय सहकार्याच्या सातत्याने मजबूत होत जाणाऱ्या प्रवासावर समाधान व्यक्त केले. पंतप्रधान मोदी आणि अध्यक्ष ट्रम्प यांनी द्विपक्षीय व्यापाराला चालना देण्यासाठी गती कायम ठेवण्याचे महत्व अधोरेखित केले.
दोघांनी महत्त्वपूर्ण तंत्रज्ञान, ऊर्जा, संरक्षण व सुरक्षा आणि इतर प्राधान्य क्षेत्रांमध्ये सहकार्य वाढवण्यावर चर्चा केली, जे 21व्या शतकासाठी भारत-अमेरिका कॉम्पॅक्ट (सैन्य भागीदारी, वेगवान व्यापार आणि तंत्रज्ञानासाठी उत्प्रेरक) यांच्या अंमलबजावणीसाठी अत्यंत महत्त्वाचे मानले जातात.नेत्यांनी विविध प्रादेशिक आणि जागतिक घडामोडींवरही चर्चा केली आणि सामायिक आव्हानांवर उपाय शोधण्यासाठी व सामायिक हितसंबंधांना पुढे नेण्यासाठी एकत्र काम करण्याचे ठरवले. त्यांनी सतत संपर्कात राहण्याबाबतही सहमती दर्शवली.
पंतप्रधान मोदी यांनी या चर्चेबाबत एक्स (ट्विटर) वर लिहिले—“राष्ट्राध्यक्ष ट्रम्प यांच्यासोबत अतिशय सौहार्दपूर्ण आणि सार्थक चर्चा झाली. आपण द्विपक्षीय संबंधांतील प्रगतीचा आढावा घेतला आणि प्रादेशिक व आंतरराष्ट्रीय घडामोडींवर चर्चा केली. जागतिक शांतता, स्थिरता आणि समृद्धीसाठी भारत आणि अमेरिका एकत्रितपणे कार्य करत राहतील.”
---------------
हिंदुस्थान समाचार / Priyanka Bansode
