नवी दिल्ली, 11 डिसेंबर (हिं.स.) देशातील सर्वात मोठी विमान कंपनी इंडिगोने अलिकडच्या संकटामुळे बाधित झालेल्या प्रवाशांना परतफेड केल्यानंतर अतिरिक्त भरपाई जाहीर केली आहे. पण ही सवलत काही निवडक प्रवाशांनाच उपलब्ध असणार आहे.

इंडिगोने सांगितले की, जर प्रवाशांनी ट्रॅव्हल पार्टनर प्लॅटफॉर्मवरून तिकिटे खरेदी केली असतील तर सर्व परतफेड प्रक्रिया सुरू करण्यात आल्या आहेत. तथापि, एअरलाइनकडे त्यांच्या सिस्टममध्ये अशा प्रवाशांची संपूर्ण माहिती नाही. अशा परिस्थितीत, प्रवासी इंडिगोच्या ईमेल पत्त्यावर माहिती देऊ शकतात: customer.experience@goindigo.in. आम्ही त्यांना मदत करत राहू.

इंडिगोने पुढे म्हटले आहे की ३, ४ आणि ५ डिसेंबर रोजी एअरलाइनसोबत प्रवास करणाऱ्या प्रवाशांना वाईट अनुभव आला आणि ते अनेक तास विमानतळावर अडकून पडले. त्यापैकी अनेकांना प्रचंड गर्दीचा गंभीर फटका बसला. आम्ही या बाधित प्रवाशांना १०,००० रुपयांचे प्रवास व्हाउचर प्रदान करू. पुढील १२ महिन्यांत इंडिगोसोबतच्या कोणत्याही प्रवासासाठी हे ट्रॅव्हल व्हाउचर वापरता येतील.

इंडिगोने स्पष्ट केले की, ही अतिरिक्त भरपाई आहे. एअरलाइननुसार, ज्या प्रवाशांची उड्डाणे पूर्वसूचना न देता सुटण्याच्या वेळेच्या २४ तासांच्या आत रद्द केली जातात त्यांना सरकारी मार्गदर्शक तत्त्वांनुसार ५,००० ते १०,००० पर्यंत भरपाई देण्यास ते वचनबद्ध आहे.

---------------

हिंदुस्थान समाचार / वृषाली देशपांडे