इस्लामाबाद , 16 डिसेंबर (हिं.स.)।पाकिस्तानच्या सिंध प्रांतात अज्ञात बंदूकधारकांनी बसमधील प्रवाशांवर हल्ला करून कमीतकमी 18 लोकांचा अपहरण केला आहे. हे लोक बसने क्वेटाकडे जात होते. ही घटना सिंध प्रांतातील घोटाकी परिसराजवळ घडली. या अपहरणानंतर पाकिस्तानमध्ये मोठा गोंधळ उडाला.

माहितीनुसार, अज्ञात बंदूकधारकांनी नियोजनबद्ध पद्धतीने हा हल्ला केला. त्यांनी सिंध आणि पंजाब सीमेच्या जवळील लिंक रोडवर रात्री बसवर गोळीबार केला आणि नंतर 18 प्रवाशांना घेऊन गेले. या फायरिंगमध्ये बसचा चालक आणि काही प्रवासी जखमी झाले आहेत.

बसमधील एका महिलेनं सांगितलं की सुमारे 20 हल्लेखोर तिथे उपस्थित होते आणि सर्वांच्या हातात शस्त्र होते. सर्वांचे चेहरे झाकलेले होते. हल्लेखोरांनी पुरुष प्रवाशांना बसमधून उतरायला सांगितलं, तर महिला प्रवाशांना काही इजा झाली नाही. महिला म्हणाली की बंदूकधारक अनेक प्रवाशांना घेऊन गेले.

सिंधच्या गृहमंत्र्याचे प्रवक्ते जिया उल हसन लांझर यांनी या घटनेला दुःखद मानलं आहे. लांझर म्हणाले की, ड्रायव्हर आणि परिचालकांसह बसमध्ये सुमारे 30 प्रवासी होते. सध्या पोलिसांनी घटनेची चौकशी सुरू केली आहे. यादरम्यान, पाकिस्तानमध्ये अज्ञात बंदूकधारकांचा हा पहिलाच दहशतवादी हल्ला नाही. याआधी खैबर पख्तूनख्वा आणि बलूचिस्तानमध्येही अज्ञात बंदूकधारकांचा दहशतवाद सुरू होता. त्यांनी सतत सुरक्षा दलांना लक्ष्य केले आहे.

---------------

हिंदुस्थान समाचार / Priyanka Bansode