रत्नागिरी, 16 डिसेंबर, (हिं. स.) : ऑडाक्स इंडिया रँडोनिअर्स संलग्न चिपळूणच्या सह्याद्री रँडोनिअर्सने आयोजित केलेली १००० किमी बीआरएम चिपळूण सायकलिंग क्लबचे श्रीकांत जोशी यांनी वयाच्या छप्पनाव्या वर्षी पूर्ण केली.

श्रीकांत जोशी यांच्यासमवेत कराड येथील रविराज जाधव व चंद्रजित पाटील हे रायडर्सदेखील सहभागी झाले होते.

ऑडाक्स इंडिया रँडोनिअर्सच्या अंतर्गत भारतातील विविध क्लब बीआरएम या सायकल क्रीडाप्रकाराचे आयोजन करतात. २००, ३००, ४००, आणि ६०० किमी अंतर सायकल चालविण्यासाठी अनुक्रमे १३.५ तास, २० तास, २७ तास आणि ४० तासांची मुदतवेळ निर्धारित केलेली असते, तर १००० किमीसाठी ७५ तासांची वेळ निश्चित केलेली असते. संपूर्णपणे सेल्फ सपोर्टेड असे या राइड्सचे स्वरूप असते. जानेवारी ते डिसेंबर या मुदतीत ही बीआरएम पूर्ण केल्यानंतर रायडरला सुपर रँडोनिअर किताब मिळतो. श्रीकांत जोशी यांनी यापूर्वीच सुपर रँडोनिअर हा किताब पटकावला असून १००० किमी बीआरएम पूर्ण करून त्यांनी आपल्या शिरपेचात नवीन पीस खोवले आहे.

श्रीकांत जोशी चिपळूण सायकलिंग क्लबचे सदस्य असून आपल्या या यशाबद्दल बोलताना चिपळूण सायकलिंग क्लबच्या सर्व सदस्यांच्या सहकार्याने आपण हे यश मिळविल्याचे त्यांनी नमूद केले. नोसिल कंपनीमधून निवृत्ती घेतल्यानंतर बागकाम व इतर आवडी जोपासत असतानाच कोरोनानंतरच्या कालखंडात सायकलिंगची आवड त्यांना या विक्रमांकडे घेऊन गेली.

सह्याद्री रँडोनिअर्स क्लबने कराड, सोलापूर, अंबेजोगाई, सोलापूर, विजापूर, कराड या मार्गावर बीआरएम आयोजित केली होती. सायकलपटूंची सुरक्षितता जपत असतानाच त्यांचे मनोबल कसे उंचावेल, त्यांचा आहार, तब्येत याकडे विशेष लक्ष ठेवल्याबद्दल सह्याद्री रँडोनिअर्सचे प्रमुख मनोज भाटवडेकर यांच्याविषयी आदरभाव व्यक्त करताना श्रीकांत जोशी यांनी आयोजकांचे संपूर्ण मार्गावर उपस्थित असण फार महत्त्वाचे ठरते, असे सांगितले.

---------------

हिंदुस्थान समाचार / रत्नागिरी