मनसेसह पाच पक्ष एकत्र येण्याची शक्यता

नाशिक, 20 डिसेंबर (हिं.स.)। राज्यात महानगरपालिका निवडणुकांची रणधुमाळी सुरू असताना नाशिकच्या राजकीय पटलावर वेगळीच घडामोड पाहायला मिळत आहे. नाशिकमध्ये महाविकास आघाडीचा विस्तार होण्याची शक्यता असून महाराष्ट्र नवनिर्माण सेना (मनसे), काँग्रेस आणि राष्ट्रवादी काँग्रेस (शरद पवार गट) एकत्र येण्याबाबत हालचालींना वेग आला आहे. याबाबतची अधिकृत घोषणा सोमवारी होण्याची शक्यता व्यक्त केली जात असून, त्या पार्श्वभूमीवर जागावाटपाच्या नियोजनासाठी आज रविवारी ( दि. २१) बैठकांचे आयोजन करण्यात आल्याची माहिती स्थानिक नेत्यांनी दिली आहे.

महानगरपालिका निवडणुकांच्या पार्श्वभूमीवर नाशिकमध्ये महाविकास आघाडीत मनसेचा समावेश होणार असल्याची चर्चा जोर धरू लागली आहे. यासंदर्भात वरिष्ठ पातळीवर चर्चा सुरू असल्याचे सांगितले जात असले, तरी प्रत्यक्षात स्थानिक स्तरावर हा निर्णय जवळपास निश्चित झाल्याचा दावा मनसेच्या नेत्यांनी केला आहे. त्याचबरोबर जागावाटपाबाबतही प्राथमिक चर्चा झाल्याचे समजते.

यापूर्वी महाविकास आघाडीत मनसेला सामावून घेण्यास काँग्रेसचा विरोध होता. मात्र भाजपला सत्तेपासून रोखण्यासाठी एकत्र लढणे गरजेचे असल्याची भूमिका आता काही काँग्रेस नेत्यांकडून मांडली जात आहे. त्यामुळे नाशिकमध्ये तरी महाविकास आघाडीत पाच पक्ष एकत्र मैदानात उतरण्याची शक्यता बळावली आहे.

आगामी नाशिक महानगरपालिका निवडणुकीच्या पार्श्वभूमीवर शहरातील राजकीय वातावरण चांगलेच तापले आहे. विविध पक्षांकडून युती, आघाड्या आणि स्वतंत्र लढती याबाबत हालचाली सुरू असून, विशेषतः महाविकास आघाडीच्या भूमिकेकडे सर्वांचे लक्ष लागले आहे. राज्यस्तरावर विरोध असूनही अखेर नाशिकपुरते का होईना काँग्रेसने मनसेला सोबत घेण्याची तयारी दर्शविल्याचे चित्र आहे.सूत्रांच्या माहितीनुसार, नाशिकमध्ये महाविकास आघाडीमध्ये मनसे, शिवसेना उद्धव बाळासाहेब ठाकरे गट, काँग्रेस, राष्ट्रवादी काँग्रेस (शरद पवार गट) तसेच डाव्या आघाडीतील पक्षांचा समावेश असू शकतो. भाजपविरोधात ताकद एकवटण्याच्या उद्देशाने हा प्रयोग केला जात असल्याचे बोलले जात आहे. नाशिकसारख्या बहुपक्षीय राजकारण असलेल्या शहरात युतीशिवाय सत्ता मिळवणे कठीण असल्याची जाणीव सर्वच पक्षांना झाल्याचे दिसते.दरम्यान, समाजवादी पक्षाने मात्र महाविकास आघाडीत सहभागी न होण्याची भूमिका घेतली आहे. मुंबईत समाजवादी पक्षाचे प्रदेशाध्यक्ष व आमदार अबू आझमी यांनी ‘एकला चलो रे’ची भूमिका जाहीर केल्यानंतर नाशिकमध्येही समाजवादी पक्ष आघाडीत सहभागी होणार नसल्याचे जवळपास निश्चित मानले जात आहे.

भाजपला रोखण्यासाठी एकत्र

याबाबत काँग्रेसचे शहराध्यक्ष आकाश छाजेड म्हणाले की, आम्ही महाविकास आघाडी अर्थात ‘इंडिया आघाडी’चा भाग आहोत. मनसेला आघाडीत सामावून घ्यायचे की नाही, याचा निर्णय वरिष्ठ पातळीवर होईल. वरिष्ठ नेत्यांचा निर्णय आम्हाला मान्य असेल. भाजपला रोखण्यासाठी नाशिकमध्ये विरोधकांची ताकद एकवटणे, हाच आमचा मुख्य उद्देश असल्याचे छाजेड यांनी सांगितले.

मनसेसह पाच पक्ष एकत्र

मनसेचे शहराध्यक्ष सुदाम कोंबडे म्हणाले की, आम्ही महाविकास आघाडीच्या माध्यमातूनच निवडणूक लढवणार आहोत. काँग्रेस, राष्ट्रवादी काँग्रेस (शरद पवार गट), शिवसेना उद्धव बाळासाहेब ठाकरे गट, डावी आघाडी आणि मनसे असे पाच पक्ष एकत्र येणार आहेत. याबाबत वरिष्ठ पातळीवर चर्चा सुरू असून अंतिम निर्णय लवकरच होईल. मनसे अध्यक्ष राज ठाकरे जो आदेश देतील, त्यानुसार काम केले जाईल.”

---------------

हिंदुस्थान समाचार / GOSAVI CHANDRASHEKHAR SUKDEV