जळगाव, 20 डिसेंबर (हिं.स.) : तालुक्यातील चिंचोली गावाजवळ सिमेंट वाहतूक करणाऱ्या ट्रॅक्टरला समोरून येणाऱ्या मालवाहू पिकअप वाहनाने जोरदार धडक दिल्याने ट्रॅक्टरवरील कामगाराचा दुर्दैवी मृत्यू झाल्याची घटना घडली. या अपघातात संजय नामदेव सोनवणे (वय ४०, रा. गेंदालाल मिल परिसर, जळगाव) यांचा मृत्यू झाला असून या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. गेंदालाल मिल परिसरात कुटुंबासह वास्तव्यास असलेले संजय सोनवणे हे मजुरी करून आपल्या कुटुंबाचा उदरनिर्वाह करत होते. मालधक्क्यावरून सिमेंटच्या गोण्या वाहतूक करण्याचे काम ते नियमितपणे करीत होते. नेहमीप्रमाणे ते इतर मजुरांसह ट्रॅक्टर (क्र. एमएच १९ बीजी ६०७८) द्वारे सिमेंटच्या गोण्या भरून चिंचोली गावाकडे गेले होते. सिमेंट उतरवून जळगावकडे परत येत असताना चिंचोलीजवळ समोरून येणाऱ्या मालवाहू पिकअप वाहनाने ट्रॅक्टरला जोरदार धडक दिली. या धडकेत संजय सोनवणे यांच्या डोक्याला गंभीर दुखापत झाली. अपघातानंतर जखमी अवस्थेत त्यांना तातडीने शासकीय वैद्यकीय महाविद्यालय व रुग्णालयात दाखल करण्यात आले. मात्र वैद्यकीय अधिकाऱ्यांनी तपासणीअंती त्यांना मृत घोषित केले. घटनेची माहिती मिळताच एमआयडीसी पोलिसांनी घटनास्थळी भेट देऊन पंचनामा केला असून पुढील तपास सुरू आहे.

---------------

हिंदुस्थान समाचार / मनोहर कांडेकर