मुंबई, 21 डिसेंबर (हिं.स.)। प्रीमियम मोटरसायकल उत्पादक केटीएम इंडियाने भारतात आपल्या सर्वात छोट्या केटीएम १६० ड्यूकचा नवा टॉप-स्पेक व्हेरिएंट लाँच केला आहे. या नव्या व्हेरिएंटचे मुख्य आकर्षण म्हणजे 5-इंचाचा कलर TFT इंस्ट्रूमेंट क्लस्टर, जो ब्लूटूथ कनेक्टिव्हिटी आणि नेव्हिगेशन सपोर्टसह येतो. कंपनीने या व्हेरिएंटची एक्स-शोरूम दिल्ली किंमत 1,78,536 रुपये ठेवली असून, हा व्हेरिएंट स्टँडर्ड केटीएम १६० ड्यूक पेक्षा 7,991 रुपये महाग आहे. सध्या स्टँडर्ड 160 ड्यूक 1,70,545 रुपयांना उपलब्ध असून त्यात LCD इंस्ट्रूमेंट क्लस्टर दिला जातो.

या नव्या व्हेरिएंटमध्ये देण्यात आलेला TFT डिस्प्ले थेट केटीएम 390 ड्यूक मधून घेतलेला असून, सब-400cc सेगमेंटमधील केटीएमच्या मॉडेल्समध्ये वापरला गेला आहे. हा डिस्प्ले हँडलबारच्या डाव्या बाजूला असलेल्या स्विच क्यूबद्वारे ऑपरेट केला जातो आणि केटीएम My Ride कनेक्टिव्हिटी सूटला सपोर्ट करतो. स्मार्टफोनशी कनेक्ट केल्यानंतर राइडर्सना टर्न-बाय-टर्न नेव्हिगेशन, येणाऱ्या कॉल्सचे व्यवस्थापन, म्युझिक कंट्रोल आणि हेडसेट पेअरिंगची माहिती थेट स्क्रीनवर पाहता येते. तसेच, डिस्प्लेवर राइड मोड सिलेक्शन आणि संबंधित सिस्टम प्रॉम्प्टही दाखवले जातात.

कनेक्टिव्हिटी फिचर्सव्यतिरिक्त, TFT स्क्रीनमुळे राइडर्सना लेफ्ट हँडलबारवरील कंट्रोल्स वापरून शिफ्ट RPM आणि लिमिट RPM सेटिंग्स कस्टमाइझ करण्याची सुविधा मिळते. एकदा हे पॅरामिटर्स सेट केल्यानंतर, निवडलेल्या राइडिंग मोडनुसार डिस्प्ले आपोआप डार्क आणि ऑरेंज थीममध्ये बदलतो.

केटीएम १६० ड्यूक ही ड्यूक रेंजमधील एंट्री-लेव्हल मोटरसायकल म्हणून सादर करण्यात आली आहे, कारण यंदा सुरुवातीला केटीएम 125 ड्यूक बंद करण्यात आली होती. या बाइकमध्ये 164.2cc क्षमतेचे लिक्विड-कूल्ड, सिंगल-सिलेंडर इंजिन देण्यात आले असून, ते 9,500 rpm वर 18.7 bhp पॉवर आणि 7,500 rpm वर 15.5 Nm टॉर्क निर्माण करते. हे इंजिन 6-स्पीड गिअरबॉक्ससह येते.

---------------

हिंदुस्थान समाचार / Suraj Chaugule