नवी दिल्ली , 25 डिसेंबर (हिं.स.)। जगभरात आज नाताळचा सण उत्साहात साजरा केला जात आहे. या निमित्ताने पंतप्रधान नरेंद्र मोदी आणि राष्ट्रपती द्रौपदी मुर्मू यांनी देशवासीयांना शुभेच्छा दिल्या. येशू ख्रिस्तांच्या शिकवणी समाजातील सद्भाव अधिक बळकट करतील, अशी आशा त्यांनी व्यक्त केली.

पंतप्रधान मोदी यांनी ‘एक्स’वरील पोस्टमध्ये लिहिले, “सर्वांना शांती, करुणा आणि आशेने परिपूर्ण आनंदी नाताळच्या शुभेच्छा. येशू ख्रिस्तांच्या शिकवणींमुळे आपल्या समाजात सद्भाव अधिक दृढ होवो.” येशू ख्रिस्तांच्या जन्माच्या स्मरणार्थ जगातील सर्वात मोठी ख्रिश्चन लोकसंख्या ख्रिसमस साजरा करते. ख्रिसमसच्या निमित्ताने पंतप्रधान नरेंद्र मोदी दिल्लीतील ‘कॅथेड्रल चर्च ऑफ द रिडेम्प्शन’ येथे सकाळच्या प्रार्थना सभेत सहभागी झाले. येथे प्रार्थना, कॅरोल्स आणि भजने सादर करण्यात आली. दिल्लीचे बिशप डॉ. पॉल स्वरूप यांनी पंतप्रधानांसाठी विशेष प्रार्थना केली.

दरम्यान, राष्ट्रपती द्रौपदी मुर्मू यांनीही देशवासीयांना नाताळच्या शुभेच्छा दिल्या. राष्ट्रपतींनी ‘एक्स’वरील पोस्टमध्ये लिहिले, “नाताळच्या या पवित्र प्रसंगी मी सर्व नागरिकांना, विशेषतः ख्रिश्चन समुदायातील बंधू-भगिनींना मनःपूर्वक शुभेच्छा व अभिनंदन करते.” राष्ट्रपतींनी पुढे लिहिले, “आनंद आणि उत्साहाचा हा सण प्रेम व करुणेचा संदेश देतो. मानवतेच्या कल्याणासाठी प्रभू येशू ख्रिस्तांनी केलेल्या त्यागाची आठवण हा सण करून देतो. हा पवित्र दिवस समाजात शांती, सद्भाव, समता आणि सेवाभाव यांचे मूल्य अधिक बळकट करण्यासाठी आपल्याला प्रेरणा देतो.”

पुढे त्या म्हणाल्या, “चला, येशू ख्रिस्तांनी दाखवलेल्या मार्गावर चालण्याचा संकल्प करूया आणि दया व परस्पर सद्भाव वाढवणाऱ्या समाजनिर्मितीसाठी एकत्रितपणे कार्य करूया.”

---------------

हिंदुस्थान समाचार / Priyanka Bansode