रत्नागिरी, 27 डिसेंबर, (हिं. स.) : ऑडाक्स इंडिया रँडोनिअर्स संलग्न चिपळूणच्या सह्याद्री रँडोनिअर्सतर्फे आयोजित २०० किमी, ३०० किमी, ४०० किमी आणि ६०० किमी बीआरएम पूर्ण करून चिपळूण सायकलिंग क्लबच्या सौ. रमा करमरकर यांनी सुपर रँडोनिअर किताब पटकावला आहे.

ऑडाक्स इंडिया रँडोनिअर्सच्या अंतर्गत भारतातील विविध क्लब बीआरएम या सायकल क्रीडाप्रकाराचे आयोजन करतात. २००, ३००, ४००, आणि ६०० किमी अंतर सायकल चालविण्यासाठी अनुक्रमे १३.५ तास, २० तास, २७ तास आणि ४० तासांची मुदतवेळ निर्धारित केलेली असते. संपूर्ण पणे सेल्फ सपोर्टेड असे या राइड्सचे स्वरूप असते. जानेवारी ते डिसेंबर या मुदतीत ही बीआरएम पूर्ण केल्यानंतर रायडरला सुपर रँडोनिअर किताब मिळतो. सौ. रमा करमरकर यांनी ६०० किमीची बीआरएम ४० तासांच्या आत पूर्ण करून सुपर रँडोनिअर हा किताब मिळविला आहे.

सह्याद्री रँडोनिअर्स क्लबने कराड सोलापूर, विजापूर, तासगाव, कराड या मार्गावर ही बीआरएम आयोजित केली होती. या मोहिमेसाठी मुंबई, सातारा, विटा, इचलकरंजी, चिपळूण येथून सायकलस्वार सहभागी झाले होते. सायकलपटूंची सुरक्षितता जपत असतानाच त्यांचे मनोबल कसे उंचावेल, त्यांचा आहार, तब्येत याकडे विशेष लक्ष ठेवल्याबद्दल सह्याद्री रँडोनिअर्सचे सर्वेसर्वा मनोज भाटवडेकर यांच्याविषयी सर्वच सायकलपटूंनी कृतज्ञता व्यक्त केली. आदरभाव व्यक्त करताना आयोजकांचे संपूर्ण रुटवर उपस्थित असणे फार महत्त्वाचे ठरते, असे त्यांनी नमूद केले.

सौ. करमरकर चिपळूण सायकलिंग क्लबच्या सदस्या असून आपल्या या यशाबद्दल बोलताना चिपळूण सायकलिंग क्लबच्या सर्व सदस्यांच्या सहकार्याने आपण हे यश मिळविल्याचे त्यांनी नमूद केले. सौ. करमरकर या चिपळूण पोलीस ठाण्यात हेडकॉन्स्टेबल असून खात्यांतर्गत विविध क्रीडा स्पर्धांमध्ये त्यांचा सहभाग असतो. अशा स्पर्धांमधून त्यांनी यापूर्वी भरघोस यश प्राप्त केले आहे. २०२१ च्या महापुरामधे अडकलेल्या नागरिकांचे जीव वाचविल्याच्या धाडसाने कामगिरीबद्दल अनेक पुरस्कार त्यांना मिळाले आहेत. तालुक्यातील एकेकट्या वृद्धांची काळजी घेणाऱ्या सांजसोबत ग्रुपच्याही त्या सदस्या आहेत. पोलीस ठाण्यात तक्रारी घेऊन येणाऱ्या स्त्रियांचे व त्यांच्या कुटुंबीयांचे समुपदेशन करण्याबरोबरच त्यांना मदत मिळवून देण्यासाठी त्या सदैव अग्रेसर असतात.

---------------

हिंदुस्थान समाचार / रत्नागिरी