नवी दिल्ली, 28 डिसेंबर (हिं.स.)भारतीय क्रिकेट नियामक मंडळाने (बीसीसीआय) १९ वर्षांखालील विश्वचषक स्पर्धेसाठी भारतीय संघाची घोषणा केली. आयुष म्हात्रेला कर्णधार म्हणून नियुक्त करण्यात आले आहे, तर विहान मल्होत्राला उपकर्णधार म्हणून नियुक्त करण्यात आले आहे. स्फोटक फलंदाज वैभव सूर्यवंशीचाही संघात समावेश करण्यात आला आहे. पुढील वर्षाच्या सुरुवातीला तीन सामन्यांच्या एकदिवसीय मालिकेसाठी टीम इंडिया दक्षिण आफ्रिकेचा दौरा करणार आहे. १९ वर्षांखालील विश्वचषक स्पर्धेसाठी निवडलेला तोच संघ या मालिकेतही खेळणार आहे.
१९ वर्षांखालील विश्वचषक १५ जानेवारी ते ६ फेब्रुवारी दरम्यान झिम्बाब्वे आणि नामिबियामध्ये होणार आहे. १६ संघांची संघ चार गटांमध्ये विभागण्यात आली आहे. पाच वेळा १९ वर्षांखालील विश्वचषक विजेता भारत न्यूझीलंड, अमेरिका आणि बांगलादेशसह गट ब मध्ये आहे. भारत १५ जानेवारी रोजी अमेरिकेविरुद्धच्या सामन्याने आपल्या मोहिमेची सुरुवात करेल. त्यानंतर संघ १७ जानेवारी रोजी बांगलादेश आणि २४ जानेवारी रोजी न्यूझीलंडशी सामना करेल. स्पर्धेचा अंतिम सामना हरारे येथे खेळवला जाणार आहे.
यापूर्वी, टीम इंडिया तीन सामन्यांच्या एकदिवसीय मालिकेसाठी दक्षिण आफ्रिकेचा दौरा करणार आहे. १९ वर्षांखालील एकदिवसीय विश्वचषकापूर्वी ही मालिका भारतासाठी महत्त्वाची आहे. बीसीसीआयने आयुष म्हात्रे आणि विहान मल्होत्रा या मालिकेत खेळणार नसल्याचे जाहीर केले. दोघेही मनगटाच्या दुखापतींमुळे त्रस्त आहेत. परिणामी, बोर्डाने वैभव सूर्यवंशी यांना कर्णधार आणि आरोन जॉर्ज यांना उपकर्णधार म्हणून नियुक्त केले आहे. हे तीन सामने अनुक्रमे ३, ५ आणि ७ जानेवारी रोजी विलोमोर पार्क येथे खेळले जातील.
दक्षिण आफ्रिका दौऱ्यासाठी भारतीय संघ: वैभव सूर्यवंशी (कर्णधार), आरोन जॉर्ज (उपकर्णधार), वेदांत त्रिवेदी, अभिज्ञान कुंडू (यष्टीरक्षक), हरवंश सिंग (यष्टीरक्षक), आर.एस. अंबरिस, कनिष्क चौहान, खिलन ए. पटेल, मोहम्मद एनन, हेनिल पटेल, डी. दीपेश, किशन कुमार सिंग, उद्धव मोहन, युवराज गोहिल, राहुल कुमार.
अंडर-19 एकदिवसीय विश्वचषक स्पर्धेसाठी भारतीय संघः आयुष म्हात्रे (कर्णधार), विहान मल्होत्रा (उपकर्णधार), वैभव सूर्यवंशी, आरोन जॉर्ज, वेदांत त्रिवेदी, अभिज्ञान कुंडू (यष्टीरक्षक), हरवंश सिंग (यष्टीरक्षक), आर.एस. अंबरीश, कनिष्क चौहान, खिलन ए. पटेल, मोहम्मद एनान, हेनिल पटेल, डी. दिपेश, किशन कुमार सिंग, उद्धव मोहन.
---------------
हिंदुस्थान समाचार / वृषाली देशपांडे
