नवी दिल्ली, 28 डिसेंबर (हिं.स.)भारत आणि न्यूझीलंड पुढील महिन्यात तीन सामन्यांची एकदिवसीय मालिका खेळणार आहेत. ज्यासाठी भारतीय संघाची घोषणा पुढील काही दिवसांत होण्याची अपेक्षा आहे. या मालिकेसाठी ऋषभ पंतची निवड होण्याची शक्यता कमी आहे. भारत आणि न्यूझीलंडमधील एकदिवसीय मालिका ११ जानेवारीपासून सुरू होईल. जर पंतला संधी मिळाली नाही तर यष्टीरक्षक इशान किशनला संघात स्थान मिळणार असल्याची चर्चा भारतीय क्रिकेट वर्तुळात आहे.

इशानला अलीकडेच टी२० विश्वचषक आणि न्यूझीलंडविरुद्धच्या पाच सामन्यांच्या टी२० मालिकेसाठी संघात स्थान देण्यात आले. इशानने देशांतर्गत क्रिकेटमध्ये दमदार कामगिरी करून राष्ट्रीय संघात पुनरागमन केले आहे. पंतने शेवटचा भारताकडून ७ ऑगस्ट २०२४ रोजी श्रीलंकेविरुद्धच्या एकदिवसीय सामन्यात खेळला होता. दक्षिण आफ्रिकेविरुद्धच्या एकदिवसीय मालिकेसाठी पंतचाही समावेश असला तरी, तो कोणत्याही सामन्यात खेळला नाही.

पंतच्या अनुपस्थितीत, ईशान एकदिवसीय संघात स्थान मिळविण्याचा दावेदार आहे. ईशानने भारताकडून शेवटचा २०२३ च्या एकदिवसीय विश्वचषकात अफगाणिस्तानविरुद्ध खेळला होता. तेव्हापासून तो एकदिवसीय संघाबाहेर आहे. ईशान २०२५ च्या सय्यद मुश्ताक अली ट्रॉफीमध्ये सर्वाधिक धावा करणारा फलंदाज होता आणि झारखंडला स्पर्धेतील पहिल्या विजेतेपदात त्याने महत्त्वाची भूमिका बजावली. ईशानने अंतिम सामन्यात हरियाणाविरुद्ध शतक झळकावले. ईशानने विजय हजारे ट्रॉफीमध्ये हा फॉर्म कायम ठेवला, कर्नाटकविरुद्ध ३३ चेंडूत शतक झळकावले, जे लिस्ट ए क्रिकेटमध्ये भारतीय संघाचे दुसरे सर्वात जलद शतक आहे.

दुसरीकडे, दुखापतीनंतर शुभमन गिल एकदिवसीय मालिकेत कर्णधार म्हणून परतू शकतो. गिल मानेच्या दुखापतीमुळे दक्षिण आफ्रिकेविरुद्धच्या एकदिवसीय मालिकेचा भाग नव्हता. पण उपकर्णधार श्रेयस अय्यर न्यूझीलंड मालिकेचा भाग असेल की, नाही हे अद्याप स्पष्ट नाही. श्रेयसला ऑस्ट्रेलिया दौऱ्यादरम्यान दुखापत झाली होती आणि त्याने बीसीसीआय सेंटर ऑफ एक्सलन्स येथे नेटमध्ये फलंदाजी करण्यास सुरुवात केली आहे. पण त्याला अद्याप खेळण्याची परवानगी मिळालेली नाही.

दक्षिण आफ्रिकेविरुद्धच्या एकदिवसीय मालिकेत केएल राहुलने एकदिवसीय संघाचे नेतृत्व केले होते, जी भारताने २-१ अशी जिंकली होती. पंत सध्या विजय हजारे ट्रॉफीमध्ये दिल्लीचे प्रतिनिधित्व करत आहे, त्याने पहिल्या दोन सामन्यात ५ आणि ७० धावा केल्या आहेत.

---------------

हिंदुस्थान समाचार / वृषाली देशपांडे