मुंबई, 3 डिसेंबर (हिं.स.)। आंतरराष्ट्रीय दिव्यांग व्यक्ती दिनानिमित्त गोदरेज कंझ्युमर प्रॉडक्ट्स लिमिटेडने (जीसीपीएल) समावेशन, विविधता आणि समानतेच्या मूल्यांना अधोरेखित करणारी एक प्रभावी डिजिटल फिल्म प्रदर्शित केली आहे. तामिळनाडूमधील त्यांच्या सुलभ ग्रीनफील्ड उत्पादन सुविधेत काम करणाऱ्या दिव्यांग कर्मचाऱ्यांच्या वास्तविक अनुभवांवर आधारित ही फिल्म कार्यस्थळी समावेश ही निवड नसून आवश्यकतेचा भाग आहे, हा संदेश दृढपणे देते.

फिल्ममध्ये कारखान्यातील दैनंदिन कामकाज, अचूकतेने काम करणारे हात, एकमेकांना आधार देणाऱ्या टीम्स आणि कौशल्ये आत्मविश्वासाने वापरणारे कर्मचारी यांची झलक दाखवण्यात आली आहे. भारतीय सांकेतिक भाषेचा वापर, सुलभ वर्कस्टेशन्स आणि मिश्र-क्षमतेच्या टीम्सद्वारे निर्माण होणारे सहयोग हे जीसीपीएलच्या समतेच्या संस्कृतीचे महत्त्वाचे पैलू फिल्ममध्ये प्रभावीपणे दिसून येतात.

जीसीपीएलचे एमडी आणि सीईओ सुधीर सीतापती यांनी सांगितले की कंपनीने गेल्या काही वर्षांत दिव्यांगांच्या रोजगारनिर्मितीत उल्लेखनीय प्रगती केली असून या उपक्रमांचा विस्तार समाजातील इतर संस्थांनीही करावा, हा या डिजिटल फिल्मच्या माध्यमातून दिलेला मुख्य संदेश आहे. दिव्यांग व्यक्ती हे भारताच्या ग्राहक समूहाचा महत्त्वाचा भाग असल्याने कंपन्यांनी त्यांच्या गरजा लक्षात घेऊन उत्पादने विकसित करण्याची आवश्यकता असल्याचेही त्यांनी नमूद केले.

कंपनीचे ग्लोबल हेड – एचआर वैभव राम यांनी सांगितले की सध्या जीसीपीएलच्या कायमस्वरूपी कर्मचाऱ्यांमध्ये दिव्यांगांचा प्रतिनिधित्व सुमारे एक टक्का आहे आणि कामाच्या स्वरूपानुसार ही संख्या वाढवण्याचे प्रयत्न सुरू आहेत. दिव्यांगांचा समावेश हा कोणत्याही संस्थेसाठी पर्याय नसून गरज आहे, हे अधोरेखित करत त्यांनी ‘वर्क दॅट इन्क्लूड्स’ या नवीन टूलकिटची माहिती दिली. अ‍ॅटिपिकल अ‍ॅडव्हान्टेज आणि इंटिग्रेटिव्ह सोल्युशन्ससोबतच्या भागीदारीत सुरू केलेले हे टूलकिट उद्योगात पहिल्यांदाच तयार झाले असून इतर संस्थांना अपंगत्व समावेशनाच्या प्रवासात सक्षमतेने वाटचाल करण्यास मदत करणार आहे.

फिल्ममध्ये जीसीपीएलच्या व्यापक समावेशक दृष्टिकोनाची झलक देण्यात आली आहे. महिलांबरोबरच दिव्यांग, एलजीबीटीक्यूआयए+ समुदाय आणि इतर कमी प्रतिनिधित्व असलेल्या गटांना कामाच्या ठिकाणी संधी उपलब्ध करून देण्यासाठी कंपनीने उभारलेली संरचना, इंडोनेशियातील ऑन-साइट डे-केअरपासून ते घरगुती हिंसाचाराविरोधातील प्रतिसाद प्रणालीपर्यंत विविध उपक्रम यात दिसून येतात. मालनपूर (मध्य प्रदेश) आणि चेंगलपट्टू (तामिळनाडू) येथील उत्पादन युनिट्सनी सुलभ, सुरक्षित आणि समावेशक वातावरणाच्या निर्मितीत राष्ट्रीय स्तरावरील बेंचमार्क स्थापित केला आहे. जॉब मॅपिंग, सुधारीत पायाभूत सुविधा, आयएसएल साधने आणि तांत्रिक प्रशिक्षणाच्या माध्यमातून दिव्यांगांचा समावेश केवळ कार्यस्थळ संस्कृती मजबूत करत नाही तर ऑपरेशनल उत्कृष्टतेलाही गती देतो, हे जीसीपीएलने सिद्ध केले आहे.

आपल्या या डिजिटल फिल्मद्वारे कंपनीने भरती, पायाभूत सुविधा, कौशल्य विकास, उत्पादन निर्मिती आणि समुदाय प्रभावापर्यंत सर्व स्तरांत अपंगत्व समावेशन बळकट करण्याच्या कटिबद्धतेची पुनरावृत्ती केली आहे. समावेश हा एक-पट्टीचा उद्देश नसून सतत चालणारा प्रवास आहे — एका सुलभ कारखान्यापासून सक्षम कर्मचाऱ्यांपर्यंत आणि उघडलेल्या संधींच्या दारापर्यंत, हा संदेश फिल्म प्रभावीपणे पोहोचवते.

---------------

हिंदुस्थान समाचार / Suraj Chaugule