रत्नागिरी, 5 डिसेंबर, (हिं. स.) : कसबा (संगमेश्वर) येथील श्री कर्णेश्वर देवस्थान आणि कलांगण (संगमेश्वर) यांच्या संयुक्त विद्यमाने चौथा कर्णेश्वर कला संगीत महोत्सव येत्या १२ ते १४ डिसेंबर या कालावधीत होणार आहे.

प्राचीन रामक्षेत्रातील ऐतिहासिक प्राचीन वारसा असलेले समृद्ध भारतीय स्थापत्य वैभव असलेल्या कसबा (संगमेश्वर) येथील श्री कर्णेश्वर मंदिर प्रांगणात श्री कर्णेश्वर कला-संगीत महोत्सव आयोजित करण्यात आला आहे. पुरातत्त्व आणि वस्तुसंग्रहालये संचालनालयाच्या सौजन्याने आणि श्री कर्णेश्वर देवस्थान तसेच कलांगण-संगमेश्वर यांच्या संयुक्त विद्यमाने होणाऱ्या या महोत्सवाचे हे चौथे वर्ष आहे. यावर्षी रत्नागिरी जिल्ह्यातील नृत्यगुरू सौ. श्रुती आठल्ये (कथ्थक) आणि सौ. प्रणाली तोडणकर (भरतनाट्यम्) यांच्यासह त्यांचे सहकारी यांचे कथ्थक आणि भरतनाट्यम् या दोन नृत्यशैलींचे एकत्रित दर्शन पहिल्या दिवशी, शुक्रवार, दि. १२ डिसेंबर रोजी रसिकांना अनुभवायला मिळणार आहे.

शनिवार, दि. १३ डिसेंबर रोजी नुकत्याच झालेल्या गांधर्व महाविद्यालयाच्या पखवाज अलंकार परीक्षेत देशभरात प्रथम क्रमांक प्राप्त सुप्रसिद्ध पखवाज वादक प्रथमेश तारळकर यांची पखवाज एकल वादन मैफल आयोजित केली आहे. मंदार दीक्षित (संवादिनी), विशारद गुरव (गायन), रोहित धुरी व अमित कामतेकर (पखवाज) यांची साथ त्यांना मैफलीत लाभणार आहे.

तिसऱ्या दिवशी, रविवार, दि. १४ डिसेंबर रोजी महोत्सवाचा कळस ज्येष्ठ गायक स्व. जितेंद्र अभिषेकी यांचे नातू आणि प्रसिद्ध गायक शौनक अभिषेकी यांचे चिरंजीव अभेद शौनक अभिषेकी यांच्या गायन मैफलीने चढवला जाईल. त्यांच्या साथीला तबला : प्रशांत पांडव, संवादिनी : वरद सोहनी आणि पखवाज : प्रथमेश तारळकर यांच्या साथीने मैफलीची आणि महोत्सवाची सांगता होईल. तिन्ही दिवशी रात्री ९:०० वाजता कार्यक्रमास प्रारंभ होईल.

महोत्सवात नृत्य, वादन, गायन यासोबत महोत्सवाच्या तिन्ही दिवशी मंदिराच्या प्रांगणात सह्याद्री स्कूल ऑफ आर्ट (सावर्डे) आणि डी कॅड कॉलेज (देवरूख) येथील विद्यार्थ्यांचे चित्र, शिल्प कला प्रदर्शन आयोजित केले आहे. मंदिराभोवती लावलेल्या हेरिटेज लाइट्समुळे मंदिराच्या सौंदर्यात अजूनच भर पडते. रात्रीच्या वेळी मंदिराचे दृश्य विलोभनीय असते.

संपूर्ण महोत्सव रसिकांसाठी विनामूल्य असून दरवर्षीप्रमाणे यावर्षीही कर्णेश्वर महोत्सवास उपस्थित राहावे, असे आवाहन आयोजकांनी केले आहे.

महोत्सवाच्या पहिल्या दिवशी धनंजय प्रभुघाटे यांच्या संकल्पनेतून साकारलेल्या कर्णेश्वरी साडीचे प्रकाशन होणार आहे. या साडीचे वैशिष्ट्य म्हणजे दोन्ही काठांवर कर्णेश्वर मंदिरावरील निवडक नक्षी साकारण्यात आली आहे. कोकणात पूर्ण सुती कपडे जास्त योग्य ठरतात म्हणून ही साडी सेंद्रिय कापसाच्या सुती धाग्यांनी विणलेली आहे. एक साडी विणायला किमान ५ तास लागतात. साडी हे वस्त्र भारतीय संस्कृती आणि भौगोलिक वारशाचे प्रतिबिंब आहे. साड्यांचे विविध प्रकार त्या त्या प्रदेशातील संस्कृतीचा इतिहास आणि त्या त्या प्रदेशाची ओळख आहे. कोकण मात्र साड्यांच्या या विश्वात स्वतःची ओळख, स्वतःची नाममुद्रा निर्माण करण्यात थोडा मागे राहिला. शिल्पसमृद्ध सांस्कृतिक वारसा असलेल्या श्री कर्णेश्वराच्या मंदिराच्या समर्थ वारशाचे प्रतिबिंब असलेल्या कर्णेश्वरी साडी चे उत्पादन करून साडीच्या इतिहासाच्या पटलावर एक नवीन अध्याय लिहिला जाणार आहे. संगमेश्वर तालुक्यातीलच एका उद्योजकाने केलेली ही किमया आहे. ही साडी हातमागावर विणली आहे. सुती साडी स्वदेशी आंदोलनातील पहिले हुतात्मा बाबू गेनू यांच्या स्मृतीदिनी श्री कर्णेश्वर कला संगीत महोत्सवाचे पहिल्या दिवशी प्रकाशित केली जाणार आहे. जिल्हा परिषदेच्या मुख्य कार्यकारी अधिकारी सौ. वैदेही रानडे, उपजिल्हाधिकारी डॉ. आसावरी संसारे, संगमेश्वरच्या तहसीलदार सौ. अमृता साबळे आणि सुप्रसिद्ध अभिनेत्री, निवेदिका सौ. संपदा जोगळेकर-कुळकर्णी यांच्या हस्ते प्रकाशन होणार आहे.

---------------

हिंदुस्थान समाचार / रत्नागिरी