वॉशिंग्टन, ६ डिसेंबर (हिं.स.). नोबेल शांतता पुरस्कारासाठी अथक प्रयत्न करणारे अमेरिकेचे राष्ट्राध्यक्ष डोनाल्ड ट्रम्प यांना फिफा शांतता पुरस्कार मिळाला. शुक्रवारी वॉशिंग्टनमधील केनेडी सेंटरमध्ये झालेल्या फिफा विश्वचषक २०२६ च्या सोडतीदरम्यान त्यांना पहिला फिफा शांतता पुरस्कार प्रदान करण्यात आला आहे.
स्वतःला शाश्वत शांततेचे महान राजदूत म्हणून ओळखणाऱ्या ट्रम्प यांना पहिला फिफा शांतता पुरस्कार प्रदान करण्यात आला आहे. ५ डिसेंबर रोजी वॉशिंग्टनमध्ये झालेल्या फिफा विश्वचषक सोडतीदरम्यान हा पुरस्कार प्रदान करण्यात आला. फिफा अध्यक्ष जियानी इन्फँटिनो यांनी ट्रम्प यांना पदक आणि ट्रॉफी प्रदान केली आणि म्हटले की हा पुरस्कार जगभरात शांतता आणि एकता वाढवण्यासाठी काम करण्यास प्रोत्साहन देतो. फिफा शांतता पुरस्कार मिळाल्यानंतर ट्रम्प यांनी काँगोसह जगभरातील विविध संघर्षांमध्ये त्यांच्या भूमिकेबद्दल अभिमान व्यक्त केला आणि जग आता अधिक सुरक्षित असल्याचे सांगितले. त्यांनी म्हटले की हा त्यांच्या आयुष्यातील सर्वात मोठ्या सन्मानांपैकी एक आहे. व्हाईट हाऊसने या संदर्भात सोशल प्लॅटफॉर्म एक्सवर एक पोस्ट शेअर केली आणि म्हटले की, फिफा शांतता पुरस्कार राष्ट्राध्यक्ष ट्रम्प यांच्या शांततेसाठीच्या समर्पणाचे प्रतिबिंब आहे.
२०२६ चा फुटबॉल विश्वचषक अमेरिका, कॅनडा आणि मेक्सिको संयुक्तपणे आयोजित करत आहेत. ही स्पर्धा ११ जूनपासून सुरू होणार आहे आणि १६ शहरांमध्ये १०४ सामने खेळले जातील. तथापि, या क्रीडा स्पर्धेदरम्यान ट्रम्प यांना पहिला फिफा शांतता पुरस्कार देण्याबाबत अनेक प्रश्न उपस्थित केले जात आहेत. इतक्या मोठ्या क्रीडा स्पर्धेला राजकीय संदेशांशी जोडण्यावर मोठ्या संख्येने लोक टीका करत आहेत.
---------------
हिंदुस्थान समाचार / वृषाली देशपांडे
