लेह, २९ सप्टेंबर (हिं.स.): हिंसाचारग्रस्त लेह शहरात सोमवारी सहाव्या दिवशीही संचारबंदी सुरूच राहिली. संचारबंदी असलेल्या भागात परिस्थिती एकंदरीत शांत होती. कोणताही अनुचित प्रकार घडला नाही. संवेदनशील भागात पोलीस आणि निमलष्करी दलांचा मोठा बंदोबस्त तैनात करण्यात आला आहे. आणि कायदा आणि सुव्यवस्था राखण्यासाठी ते कडक दक्षता घेत आहेत. उपराज्यपाल कविंदर गुप्ता यांनी आज एकूण सुरक्षा परिस्थितीचा आढावा घेण्यासाठी बैठक बोलावली आहे.
२४ सप्टेंबर रोजी शहरात झालेल्या व्यापक हिंसाचारात मृत्युमुखी पडलेल्या स्टॅनझिन नामग्याल आणि जिग्मेट दोरजे या दोन तरुणांचे अंतिम संस्कार रविवारी करण्यात आल्याचे एका अधिकाऱ्याने सांगितले. लेह शहरात मोबाईल इंटरनेट सेवा बंद ठेवण्यात आल्या आहेत. तर कारगिलसह केंद्रशासित प्रदेशाच्या इतर प्रमुख भागांमध्ये पाच किंवा त्याहून अधिक लोकांना एकत्र येण्यास मनाई करणारे आदेश लागू आहेत. बंददरम्यान झालेल्या व्यापक हिंसक निदर्शनांनंतर बुधवारी संध्याकाळी लेह शहरात संचारबंदी लागू करण्यात आली. या संघर्षात सुमारे ८० पोलीस अधिकाऱ्यांसह १५० हून अधिक लोक जखमी झाले होते.
निषेधानंतर दोन नगरसेवकांसह ६० हून अधिक नागरिकांना ताब्यात घेण्यात आले. यामध्ये हवामान कार्यकर्त्या सोनम वांगचुक यांचा समावेश आहे. ज्यांना शुक्रवारी राष्ट्रीय सुरक्षा कायद्यांतर्गत अटक करण्यात आली आणि राजस्थानमधील जोधपूर तुरुंगात हलवण्यात आले.
---------------
हिंदुस्थान समाचार / वृषाली देशपांडे
