अकोला, 11 जानेवारी (हिं.स.)।

मूर्तिजापूर शहर पोलिसांनी मकरसंक्रांतीच्या सणावर चायनीज व नायलॉन मांजाविरोधात कडक कारवाई केली. बंदी असूनही काही धाडसी लोकांनी मांजा वापर व विक्री केली, त्यावर ३ आरोपींवर गुन्हे दाखल करण्यात आले. पोलिसांचे हे पाऊल मृत्यू आणि गंभीर अपघात टाळण्यासाठी ठरले.

पोलीस निरीक्षक अजित जाधव यांच्या नेतृत्वाखाली, ‘ऑपरेशन प्रहार’ अंतर्गत दुचाकीस्वारांच्या सुरक्षेसाठी वाहनांवर लोखंडी सेफ्टी आर्च बसवले गेले, ज्यामुळे गळा, चेहरा व डोळ्यांना होणाऱ्या जीवघेण्या अपघातांचा धोका कमी होईल. स्थानिक छत्रपती शिवाजी चौक येथे पोलिस अधिकारी, कर्मचारी आणि पत्रकारांच्या उपस्थितीत हा उपक्रम राबवण्यात आला.

पोलिसांनी नागरिकांना धडक शब्दांत आवाहन केले: “मकरसंक्रांतीला चायनीज मांजा वापरणे बंद करा! विक्री करणाऱ्यांची माहिती पोलिसांना द्या! पक्षी आणि मानवी जीव धोक्यात येणारे हे कृत्य थांबवा!”

या कारवाईमुळे शहरात पोलिसांच्या कार्याची दाद मिळत असून, नागरिकांच्या जीवितहानी टाळण्यासाठी मूर्तिजापूर पोलिसांचे हे कडक आणि संरक्षणात्मक पाऊल महत्त्वपूर्ण ठरत आहे.

---------------

हिंदुस्थान समाचार / जयेश गावंडे