इस्लामाबाद , 11 जानेवारी (हिं.स.)।दहशतवादी संघटना जैश-ए-मोहम्मदचा प्रमुख मसूद अझहर याचा एक ऑडिओ समोर आला आहे. ज्यामध्ये ऐकू येतो की त्याच्याकडे हजारो आत्मघाती बॉम्बहल्लेखोर आहेत, जे कोणत्याही क्षणी हल्ला करण्यासाठी पूर्णपणे सज्ज आहेत. या ऑडिओतील वक्तव्यांवरून जैश-ए-मोहम्मदचा गट अजूनही एखाद्या अत्यंत धोकादायक तयारीत गुंतलेला असल्याचे स्पष्ट होते.

जैश-ए-मोहम्मदचा प्रमुख मसूद अझहरला संयुक्त राष्ट्रसंघाने दहशतवादी घोषित केले आहे. तो पाकिस्तानमध्ये राहून भारतविरोधी कारवायांचे कट रचत असल्याचा आरोप आहे. समोर आलेल्या या ऑडिओद्वारे असा दावा करण्यात आला आहे की एक हजाराहून अधिक आत्मघाती हल्लेखोर तयार असून ते भारतात घुसखोरीची परवानगी देण्यासाठी अझहरवर दबाव टाकत आहेत. अझहरचा दावा आहे की खरी संख्या समजल्यास जगभरातील माध्यमांना धक्का बसेल आणि मोठी खळबळ उडेल. त्याच्या मते, हे हल्लेखोर हल्ले करण्यासाठी आणि आपल्या उद्दिष्टासाठी शहादत मिळवण्यासाठी अत्यंत प्रेरित आहेत. मसूद अझहरच्या शब्दांत सांगायचे झाल्यास, “हे (आत्मघाती हल्लेखोर) एक नाहीत, दोन नाहीत, १०० नाहीत, हे १००० सुद्धा नाहीत. जर मी पूर्ण संख्या सांगितली, तर उद्या जगभरातील माध्यमांत गदारोळ माजेल…”

दरम्यान, पहलगाम दहशतवादी हल्ल्यानंतर भारताने राबवलेल्या ‘ऑपरेशन सिंदूर’मध्ये जैश-ए-मोहम्मदच्या ठिकाणांना मोठे नुकसान झाले होते. या कारवाईत मसूद अझहरचे अनेक निकटवर्तीय, नातेवाईक तसेच अनेक दहशतवादी ठार झाले होते. सुरक्षा तज्ज्ञांच्या मते, असे ऑडिओ संदेश सहसा तेव्हाच जारी केले जातात, जेव्हा संघटना दबावाखाली असते. त्यामुळे मसूद अझहरचा हा व्हायरल ऑडिओ त्याच्या अस्वस्थतेचे आणि चिडचिडीचे द्योतक मानले जात आहे.

सध्या हा तपासाचा विषय आहे की मसूद अझहरची संघटना नेमकी काय तयारी करत आहे, त्यांच्याकडे प्रत्यक्षात किती आत्मघाती बॉम्बहल्लेखोर आहेत आणि त्यांची पुढील योजना काय आहे. मात्र, हे सर्व ठरवण्याची जबाबदारी देशाच्या सुरक्षेची धुरा सांभाळणाऱ्या सर्वोच्च यंत्रणांवर आहे. तोपर्यंत मसूद अझहरच्या या ऑडिओमुळे मोठी खळबळ उडाली आहे.

---------------

हिंदुस्थान समाचार / Priyanka Bansode