जळगाव, 13 जानेवारी (हिं.स.) | जळगाव महानगरपालिका निवडणुकीसाठी येत्या १५ जानेवारीला मतदान तर १६ जानेवारीला मतमोजणी होणार आहे. या निवडणुकीच्या पार्श्वभूमीवर राज्य उत्पादन शुल्क विभागाच्या वतीने जळगाव शहरात मोठी कारवाई करण्यात आली आहे. शहरातील रेल्वे स्थानक व शिवाजीनगर परिसरात कारवाई करून १४० लिटर गावठी हातभट्टीची दारू जप्त करण्यात आली.
या प्रकरणी दोघांवर गुन्हा दाखल करण्यात आला आहे. किरण सीताराम सोनवणे व विवेक विजय ढाके असं गुन्हा दाखल झालेल्या दोघांची नावे आहेत.रेल्वे स्थानक व शिवाजीनगर परिसरात गावठी हातभट्टीची दारू विक्री होत असल्याची माहिती अधीक्षक डॉ. व्ही. टी. भूकन यांना मिळाली. त्यांनी निरीक्षक डी. एम. चकोर, एस. एम. मोरे, दुय्यम निरीक्षक जी. डी. अहिरे, ए. डी. पाटील, पी. पी. तायडे, आर. डी. जंजाळे, धनसिंग पावरा यांना कारवाईच्या सूचना दिल्या. पथकाने रेल्वे स्थानकाजवळ व शिवाजीनगर भागात छापा टाकला असता किरण सोनवणे व विवेक ढाके हे गावठी दारू विक्री करताना आढळले.
---------------
हिंदुस्थान समाचार / मनोहर कांडेकर
