नागपूर, 17 जानेवारी (हिं.स.) : नागपूरमध्ये संयुक्त कारवाईअंतर्गत छांगूर बाबांचा निकटवर्तीय इधू इस्लाम याला अटक करण्यात आली. इधू इस्लाम धर्मांतरण नेटवर्कमध्ये निधी आणि लॉजिस्टिक व्यवस्था सांभाळत होता. आरोपी बराच काळ फरार होता. या प्रकरणाचा तपास उत्तर प्रदेश एटीएस आणि ईडीकडून सुरू आहे.

नागपूरमध्ये शनिवारी पहाटे संयुक्त ऑपरेशनद्वारे स्वयंघोषित धर्मगुरू छांगूर बाबांचा एक महत्त्वाचा सहकारी अटक करण्यात आला. ही कारवाई महाराष्ट्र व उत्तर प्रदेशच्या अँटी टेररिझम स्क्वॉड तसेच स्थानिक पोलिसांच्या संयुक्त पथकाने केली. अधिकाऱ्यांच्या मते, ही अटक संपूर्ण नेटवर्क उद्ध्वस्त करण्याच्या दृष्टीने अत्यंत महत्त्वाची आहे. नागपूरच्या आशी नगर परिसरातून शनिवारी पहाटे सुमारे 5 वाजता त्याला ताब्यात घेण्यात आले. पोलिसांच्या माहितीनुसार, इधू इस्लाम छांगूर बाबांच्या नेटवर्कमध्ये निधी उभारणी आणि लॉजिस्टिक व्यवस्थापनाची महत्त्वाची जबाबदारी सांभाळत होता. त्याच्याविरुद्ध उत्तर प्रदेशमध्ये गंभीर गुन्हे दाखल असून त्याच्या अटकेचे वॉरंट दीर्घकाळ प्रलंबित होते. अरुंद गल्लीतील परिसरात कायदा-सुव्यवस्थेचा बिघाड होऊ न देता ही कारवाई अतिशय काळजीपूर्वक पार पाडण्यात आली.

या संपूर्ण धर्मांतरण प्रकरणाच्या केंद्रस्थानी छांगूरचे नाव आहे. तपास यंत्रणांच्या माहितीनुसार, त्याने धर्मांतरणाच्या माध्यमातून 100 कोटी रुपयांहून अधिक रक्कम जमा केली. कधीकाळी दुचाकीवर फिरणारा छांगूर नंतर आलिशान गाड्यांचा शौकीन झाला. आरोप आहे की धर्मांतरण करून तो इस्लामिक संघटनांमध्ये आपली पकड मजबूत करत होता. त्याच्या टोळीतील सदस्यांनी आतापर्यंत सुमारे 40 वेळा इस्लामिक देशांना प्रवास केला असून, यामुळे आंतरराष्ट्रीय नेटवर्क आणि निधी उभारणीचे संकेत मिळतात. तपास यंत्रणांचा आरोप आहे की छांगूरने संघटित पद्धतीने धर्मांतरणाचे जाळे उभे केले होते. हे गिरोह विशेषतः गरीब मजूर, विधवा महिला आणि सामाजिकदृष्ट्या दुर्बल घटकांना लक्ष्य करत होता. आर्थिक आमिष, खोटे आश्वासन आणि विवाहाचे प्रस्ताव देऊन लोकांची दिशाभूल करून धर्मांतरासाठी भाग पाडले जात असल्याचा आरोप आहे. पोलिसांचे म्हणणे आहे की नागपूरमध्येही बाबांचे जुने संपर्क होते, त्यानंतर त्याने उत्तर प्रदेशमध्ये आपले बस्तान मजबूत केले.

पोलिस अधिकाऱ्यांच्या माहितीनुसार, इधू इस्लाम गेल्या 2 वर्षांपासून अटकेपासून बचावत होता. ठोस गुप्त माहितीच्या आधारे त्याला पकडण्यात आले. यापूर्वी छांगूर बाबांना उत्तर प्रदेशातील बलरामपूर जिल्ह्यातील माधपूर गावातून अटक करण्यात आली होती. त्याच्याविरुद्ध राज्याविरुद्ध युद्ध छेडणे, सामाजिक तेढ निर्माण करणे, फसवणूक आणि ठगीसारखे गंभीर आरोप नोंदवण्यात आले आहेत. अधिकाऱ्यांच्या मते, या अटकेमुळे नेटवर्कमधील इतर व्यक्तींपर्यंत पोहोचणे सोपे होईल आणि येत्या काळात आणखी अटक होण्याची शक्यता आहे.

--------------------------

हिंदुस्थान समाचार / मनीष कुलकर्णी