परभणी, 17 जानेवारी (हिं.स.)। जिल्ह्यातील गंगाखेड येथील सह दिवाणी न्यायालयात सुनावणीदरम्यान गंभीर प्रकार घडल्याची घटना समोर आली आहे. न्यायालयाचे कामकाज जाणीवपूर्वक बंद पाडण्याचा तसेच न्यायाधीशांवर हल्ला करण्याचा प्रयत्न केल्याप्रकरणी एका इसमाविरुद्ध गंगाखेड पोलीस ठाण्यात गुन्हा नोंदविण्यात आला आहे.

याबाबत वरिष्ठ लिपीक श्रीमती राही अश्रोबा फपाळ (वय 46, रा. प्राध्यापक कॉलनी, गंगाखेड) यांनी दिलेल्या फिर्यादीत म्हटले आहे की, न्यायालयात नियमित फौजदारी खटला क्र. 230/2012 शासन विरुद्ध बाबुराव सावंत व इतर या प्रकरणात साक्षीदाराची सरतपासणी सुरू असताना एक इसम अचानक कोर्ट हॉलमध्ये आला. त्याने “माझ्या केसचा निकाल माझ्या विरोधात का दिला” असे म्हणत जोरजोरात आरडाओरड सुरू केली.

सदर इसमाने न्यायालयाचे कामकाज बंद पाडण्याच्या उद्देशाने गोंधळ घातला. त्यानंतर उपस्थित विधीज्ञ, सरकारी वकील, न्यायालयीन कर्मचारी यांनी त्यास पकडून कोर्ट हॉलच्या बाहेर काढले. मात्र बाहेरही तो इसम धमकी देत आरडाओरड करत होता. काही वेळातच तो पुन्हा कोर्ट हॉलमध्ये येऊन न्यायाधीशांकडे धाव घेत, मारहाण करण्याच्या उद्देशाने डायसच्या पायऱ्या चढू लागला. त्यावेळी उपस्थित विधीज्ञांनी तात्काळ त्यास रोखून पोलिसांच्या ताब्यात दिले. पोलिसांकडून मिळालेल्या माहितीनुसार, संबंधित इसमाचे नाव राम महादेव फड (वय 25, रा. हळंब, ता. परळी, जि. बीड) असे आहे. या प्रकरणी गंगाखेड पोलीस ठाण्यात गुन्हा नोंदविण्यात आला असून पोलीस निरीक्षक श्रीकांत डोंगरे यांनी तपास हाती घेतला आहे. पुढील तपास सुरू आहे.

---------------

हिंदुस्थान समाचार / Chaitanya JayantRao Chitnis