मुंबई, 18 जानेवारी (हिं.स.) टाटा मुंबई मॅरेथॉन २०२६ मध्ये कार्तिक करकेरा आणि अनिश मगर यांनी इंडियन एलिट मॅरेथॉन-पुरुष गटात पहिल्या दोन स्थानांवर बाजी मारली. तर इथिओपियाचा धावपटू ताडू अबाटे डेमे याने २:०९:५५ वेळेसह एलिट मॅरेथॉन-पुरुष गटात प्रथम स्थान पटकावले. तर त्याचाच देशबांधव मेर्हावी वेल्डेमारियमने तिसरे स्थान मिळवले. रविवारी टाटा मुंबई मॅरेथॉनमध्ये दुसरे स्थान केनियाचा धावपटू लिओनार्ड लँगाट याने पटकावले.

महिलांमध्येही इथिओपियाच्याच धावपटूंचे वर्चस्व पहायला मिळाले. येशी चेकोले हिने (2:25:13) वेळ नोंदवत अव्वल स्थान पटकावले. तर किडसन अलेमा घेब्रेमेडिन (2:27:35) द्वितीय आणि गोज्जम त्सेगाये एनय्यू (2:28:27) तृतीय क्रमांकावर आली.

कार्तिक करकेरा हा सर्वोत्तम भारतीय धावपटू ठरला. त्याने २:१९:५५ वेळेत शर्यत पूर्ण करून या गटात एक नवीन विक्रम प्रस्थापित केला. कार्तिकनंतर अनिश मगर दुसऱ्या स्थानावर राहिला, ज्याने २:२०:०८ वेळेची नोंद केली. या निकालांनी अशा मॅरेथॉनमध्ये भारतीय धावपटूंची दमदार कामगिरी अधोरेखित केली. मुंबई मॅरेथॉनमध्ये देशांतर्गत प्रतिभेसोबतच आंतरराष्ट्रीय स्तरावरील एलिट धावपटूही सहभागी होतात.

महिलांमध्ये संजीवनी जाधवने मुंबई मॅरेथॉनमध्ये प्रभावी पदार्पण केले. महिलांच्या शर्यतीत तिने एकूण दहावे स्थान पटकावले आणि २:४९:०२ वेळेसह भारतीयांमध्ये प्रथम क्रमांक मिळवला. तिच्या या कामगिरीमुळे तिला भारतीय एलिट महिलांच्या गटात अव्वल स्थान मिळाले. अनुभवी निर्मबेन ठाकोर दुसऱ्या स्थानावर राहिली, तर सोनमने तिसऱ्या स्थानावर राहून पोडियम पूर्ण केले.

भारतीय एलिट गटांमधील पहिल्या तीन विजेत्यांना अनुक्रमे ५ लाख रुपये, ४ लाख रुपये आणि ३ लाख रुपये इतकी बक्षीस रक्कम मिळाली, ज्यामुळे आंतरराष्ट्रीय उत्कृष्टतेसोबतच देशांतर्गत उदयोन्मुख प्रतिभेलाही अधोरेखित करणाऱ्या या ऐतिहासिक पर्वाची सांगता झाली.

प्रसिद्ध अभिनेता आमिर खान आणि दिग्दर्शक-निर्माती किरण राव यांच्यासह अनेक सेलिब्रिटींनी या मॅरेथॉनमध्ये भाग घेतला. तसेच कॅनडाचा आंद्रे डी ग्राससारखे आंतरराष्ट्रीय खेळाडूही आशियातील या सर्वात मोठ्या धावण्याच्या स्पर्धेत सहभागी झाले होते. या स्पर्धेतील सेलिब्रिटींच्या उपस्थितीत भर घालत, जम्मू आणि काश्मीरचे मुख्यमंत्री ओमर अब्दुल्ला आपल्या पक्षाच्या सहकाऱ्यांसोबत मॅरेथॉनमध्ये उत्साहाने धावताना दिसले.

आमिर खान म्हणाला की, आम्ही मुंबई मॅरेथनॉनमध्ये पहिल्यांदाच सहभागी होत आहोत. आम्ही पाहिलेल्या उत्साहामुळे मला असे वाटले की, आम्ही दरवर्षी येथे यायला हवे. मुंबई आणि या मॅरेथॉनमध्ये एक अद्भुत उत्साह आहे...

टाटा मुंबई मॅरेथॉनच्या (TMM) २१व्या आवृत्तीत ६९,००० हून अधिक धावपटूंनी सहभाग घेतलाय ज्यात प्रत्यक्ष मैदानावर धावणाऱ्या ६५,००० हून अधिक धावपटू आणि ३,७०० व्हर्च्युअल सहभागींचा समावेश होता. या वर्षी 'वर्ल्ड ॲथलेटिक्स गोल्ड लेबल रेस' म्हणून मान्यता मिळालेली ही मॅरेथॉन, भारतातील सर्वात मोठ्या धावण्याच्या स्पर्धांपैकी एक आहे .

---------------

हिंदुस्थान समाचार / वृषाली देशपांडे